2024 წლის ნოემბერი-დეკემბრის აქციებზე ქიმიური ნივთიერების შესაძლო გამოყენებასთან დაკავშირებით მსჯელობენ ვარშავაში, ეუთოს ადამიანური განზომილების კონფერენციაზე.
მონაწილეები სპეციალურ კვლევას განიხილავენ, სადაც ქიმიური ნივთიერების შესაძლო გამოყენების შედეგებზეა საუბარი. ეუთოში დოკუმენტი არასამთავრობო ორგანიზაციებმა, ქართველმა და საერთაშორისო ექსპერტებმა წარადგინეს.
კვლევის მიხედვით ქიმიური გამაღიზიანებლების გამოყენებამ პროტესტის მონაწილეებს ჯანმრთელობის პრობლემები ხანგრძლივად დაუტოვა.
წარდგენილი მონაცემების მიხედვით, გამოკითხულთა 29%-ს სმენის პრობლემები წელიწადზე მეტი ხნის შემდეგაც აღენიშნებოდა; 23%-ს მწვავე თავის ტკივილი; 10%-ს მხედველობის, 12%-ს სუნთქვის, 41%-ს მეხსიერებისა და კონცენტრაციის, ხოლო 37%-ს ფსიქიკური ჯანმრთელობის პრობლემები დღემდე აღენიშნება.
2025 წლის პირველ დეკემბერს BBC-მ გამოაქვეყნა დოკუმენტური ფილმი, რომელშიც გაჩნდა ვარაუდი, რომ 2024 წლის ნოემბერი-დეკემბრის დემონსტრაციების დაშლის დროს ხელისუფლებამ, სავარაუდოდ, ქიმიური ნივთიერება კამიტი გამოიყენა.
ამავე წლის 6 დეკემბერს სახელმწიფო უსაფრთხოების სამსახურმა დაადასტურა წყლის ჭავლში ქიმიური ნივთიერების შერევის ფაქტი, თუმცა მიუთითა, რომ ეს ნივთიერება არ იყო კამიტი.