შსს მინისტრის მოადგილის ალექსანდრე დარახველიძის განცხადებით, „სქროლვა-სქრინვის სამმართველოს“ ეფექტი ისაა, რომ ბოლო პერიოდში მნიშვნელოვნად შემცირდა შეურაცხმყოფელი ქმედებები.
„სქროლვა-სქრინვის სამმართველომ“, იგივე „სიძულვილის ენის წინააღმდეგ ბრძოლის სამმართველომ“, რომელიც 2026 წლის 1 ივნისს შეიქმნა, 2 კვირაში სასამართლოებს 60-მდე საქმე წარუდგინა. ზოგ საქმეზე გადაწყვეტილება უკვე მიღებულია და სოციალურ ქსელში დაწერილი პოსტებისა თუ კომენტარების გამო რამდენიმე ადამიანი 2000-დან 4000 ლარამდე დაჯარიმდა.
საქმეები შევიდა ბიძინა და ბერა ივანიშვილებზე დაწერილი FB პოსტების გამო, ასევე, დააჯარიმეს პირები რამდენიმე ოპოზიციონერი პოლიტიკოსის შესახებ დაწერილი კომენტარებისთვის.
„კარგად ნახეთ, რომ დაჯარიმდნენ ადამიანები, რომლებმაც მაგალითად, კონკრეტული ოპოზიციური პარტიის წარმომადგენლების მიმართ გამოიჩინეს შეურაცხმყოფელი დამოკიდებულება და გამოხატეს საკუთარი პოზიცია საჯარო სივრცეში. გამოხატვის თავისუფლებით დაცულია კონკრეტული პირების უფლება, რომ გამოხატონ საკუთარი პოზიცია, მაგრამ ეს გამოხატვა არ უნდა ლახავდეს სხვა ადამიანის ღირსებას.
როგორც კი სხვა ადამიანის ღირსებას ლახავს, ეს არის ლანძღვა-გინება და ეს ყველაფერი არღვევს საზოგადოებრივ წესრიგს, ბუნებრივია, ჩვენი ვალდებულებაა, მოვახდინოთ რეაგირება. ეფექტი არის ის, რომ ჩვენი თანამშრომლები ნამდვილად ადასტურებენ იმ ფაქტს, რომ თუკი მანამდე ხშირი იყო ასეთი შემთხვევები, ბოლო პერიოდში მნიშვნელოვნად შემცირდა ასეთი ქმედებები“, – განაცხადა მან.