ირანმა შაბათს, 27 ივნისს, განაცხადა, რომ აშშ-ის მიერ სამშვიდობო შეთანხმებების დარღვევის საპასუხოდ, „თავდაცვითი დარტყმები“ განახორციელა აშშ-ის შეიარაღებულ ძალებთან დაკავშირებულ სამიზნეებზე. ისლამური რესპუბლიკის საგარეო საქმეთა სამინისტროს პრესრელიზში არ არის დაკონკრეტებული, კონკრეტულად რომელი სამიზნეები დაზიანდა და სად მდებარეობს ისინი.
თეირანი ვაშინგტონის მხრიდან სამშვიდობო შეთანხმებების დარღვევად მიიჩნევს აშშ-ის ავიაციის დარტყმებს ირანში მდებარე სამიზნეებზე. ეს დარტყმები მას შემდეგ განხორციელდა, რაც 25 ივნისს ირანმა კამიკაძე-დრონით შეუტია სატვირთო გემ Ever Lovely-ს, რომელიც ჰორმუზის სრუტიდან, ომანის სანაპიროს გასწვრივ გამოდიოდა. გემი სინგაპურის დროშით გადაადგილდებოდა.
თეირანმა სპარსეთის ყურის სამხრეთ სანაპიროზე მდებარე ქვეყნები გააფრთხილა იმ შედეგების შესახებ, რომლებიც მათ ელით, თუ საკუთარ ტერიტორიას ირანზე თავდასხმებისთვის გამოიყენებინებენ.
რა არის ცნობილი აშშ-ის ბოლო დარტყმებზე ირანში
წინა დღეს, 26 ივნისის საღამოს, აშშ-ის ცენტრალურმა სარდლობამ — CENTCOM-მა — განაცხადა, რომ ირანზე დარტყმები განახორციელა „გადამწყვეტი პასუხის სახით გუშინდელ თავდასხმაზე სავაჭრო გემზე, რომელიც ჰორმუზის სრუტის გავლით გადაადგილდებოდა“.
ირანული მედიის ცნობით, 27 ივნისის ღამით აფეთქებები ისმოდა ირანის ქალაქ სირიკში. ეს ქალაქი ირანის სამხრეთში, ჰორმოზგანის პროვინციაში, ჰორმუზის სრუტესთან ახლოს მდებარეობს. სააგენტო dpa აღნიშნავს, რომ სირიკი აშშ-ის შეიარაღებული ძალების სამიზნე არაერთხელ გამხდარა. დარტყმების შესახებ ცნობები კეშმის კუნძულიდანაც ვრცელდებოდა. ამ მონაცემებით, შეტევა დაახლოებით საათ-ნახევარი გაგრძელდა.
ირანის თავდასხმა Ever Lovely-ზე ჰორმუზის სრუტეში
Ever Lovely-ზე ირანის თავდასხმა პირველი იყო ჰორმუზის სრუტეში 17 ივნისს აშშ-სა და ირანს შორის ჩარჩო შეთანხმების ხელმოწერის შემდეგ. შეთანხმება საბრძოლო მოქმედებების შეწყვეტასა და სტრატეგიულად მნიშვნელოვანი აკვატორიის განბლოკვას ითვალისწინებდა.
თავდასხმა სულ რამდენიმე საათში მოხდა მას შემდეგ, რაც ისლამური რევოლუციის გუშაგთა კორპუსმა განაცხადა, რომ გემებისთვის უსაფრთხო გავლა მხოლოდ ირანის მიერ კონტროლირებადი მარშრუტებით იქნებოდა უზრუნველყოფილი, აღნიშნავდა CNN.
ამ თავდასხმის შემდეგ გაეროს სტრუქტურაში შემავალმა საერთაშორისო საზღვაო ორგანიზაციამ — IMO-მ — შეაჩერა სპარსეთის ყურის რეგიონში დაბლოკილი ასობით გემისა და 11 ათასზე მეტი მეზღვაურის ევაკუაციის ოპერაცია. ეს გემები რეგიონში აშშ-ისა და ისრაელის მიერ ირანის წინააღმდეგ ომის დაწყების შემდეგ იყვნენ გაჩერებული. გარდა ამისა, მსოფლიო ბაზარზე ნავთობის ფასებმა კვლავ დაიწყო ზრდა.
აშშ-ის პრეზიდენტმა დონალდ ტრამპმა 26 ივნისს ირანი ცეცხლის შეწყვეტის რეჟიმის „სულელურ“ დარღვევაში დაადანაშაულა. მისი თქმით, ისლამურმა რესპუბლიკამ ჰორმუზის სრუტით მოძრავი გემების მიმართულებით სულ მცირე ოთხი უპილოტო საფრენი აპარატი გაუშვა. ამის შესახებ ტრამპმა Truth Social-ში დაწერა.
