გაეროს ადამიანის უფლებათა უმაღლესი კომისარი, ფოლკერ ტიურკი, ირანში სიკვდილით დასჯის შემთხვევების საგანგაშო მატებას ეხმაურება და თეირანს რეპრესიების შეწყვეტისკენ მოუწოდებს.
უმაღლესი კომისრის განცხადებით, ირანის ხელისუფლება უმკაცრეს სასჯელს საზოგადოებაში მასობრივი შიშის დასანერგად და პოლიტიკური დისიდენტების გასაჩუმებლად იყენებს.
უმაღლესი კომისრის განცხადებაში ნათქვამია, რომ 2026 წლის 19 მარტიდან დღემდე, ქვეყანაში ეროვნული უსაფრთხოების ბრალდებით მინიმუმ 56 ადამიანი დასაჯეს სიკვდილით. მათ შორის 27 პირი მიმდინარე წლის დასაწყისში გამართული ანტისამთავრობო პროტესტების მონაწილე იყო. გარდა ამისა, ამ დროისთვის სიკვდილით დასჯის უშუალო საფრთხის წინაშე კიდევ 100-ზე მეტი ადამიანი იმყოფება.
ტიურკი ხაზგასმით აღნიშნავს, რომ ეს განაჩენები გამოტანილია სამართლიანი სასამართლოს პრინციპების სრული დარღვევით. ბრალდებულებს ხშირად არ აქვთ წვდომა ადვოკატებზე, ხოლო მათი აღიარებითი ჩვენებები, როგორც წესი, წამებისა და იძულების შედეგადაა მოპოვებული.
უმაღლესი კომისარი მოუწოდებს ირანის ხელისუფლებას, სასწრაფოდ შეაჩეროს ყველა დაგეგმილი სიკვდილით დასჯა და დააწესოს მორატორიუმი ამ სასჯელის გამოყენებაზე.
„სიკვდილით დასჯა შეუთავსებელია სიცოცხლის ფუნდამენტურ უფლებასთან. ირანმა უნდა გადადგას ნაბიჯები ამ არაადამიანური პრაქტიკის სრული გაუქმებისკენ,“ — აღნიშნულია ფოლკერ ტიურკის განცხადებაში.
