მოკლული პედაგოგის გიგა ავალიანის საქმის პროკურორი განმარტავს, თუ როგორ ასაბუთებს პროკურატურა ბრალს – ჯგუფურად ჯანმრთელობის განზრახ მძიმე დაზიანების წაქეზებას – რომელიც არასრულწლოვან ნია იმნაძეს წაუყენეს.
განცხადება ქეთევან სონიძემ 7 აგვისტოს ჩატარებული სასამართლო სხდომის შემდეგ გააკეთა, რომელზეც ორ დაკავებულ არასრულწლოვანს – ნია იმნაძესა და ანასტასია ბერუაშვილს აღმკვეთ ღოონისძიებად პატიმრობა შეეფარდათ. ყველაზე მკაცრი აღკვეთის ღონისძიების გამოყენებას პროკურატურა ითხოვდა. ადვოკატები კი დაკავებულების აღკვეთის ღონისძიების გარეშე დატოვებას ითხოვდნენ.
„ჩვენ წაქეზებას შემდეგი გარემოებების გათვალისწინებით ვამტკიცებთ – უნდა გავითვალისწინოთ, ვინ არის მსჯავრდადებული ალექსანდრე გაბაშვილი, მისი წარსული ისტორია და მისი პიროვნება. ეს არის ე.წ. პედოფილებთან მებრძოლი პირი. მას ბრალდება ამ კვალიფიკაციითაც ედებოდა და ამაშიც გამამტყუნებელი განაჩენი დადგა – საუბარია დიღმის ძალადობების ნაწილზე. ზოგადად, ის ებრძვის ნებისმიერ ადამიანს, რომელსაც შეიძლება გარკვეული ხასიათის ინტერესი ჰქონდეს არასრულწლოვანთა მიმართ. ადამიანს, რომელსაც ასეთი წარსული გამოცდილება ჰქონდა და ასეთი პიროვნებების გამოვლენაზე ისედაც ნადირობდა, ასეთი ადამიანისთვის ინფორმაციის მიწოდება, რომ მას მასწავლებელი სექსუალურად ავიწროებდა, ეს ფაქტობრივად წაქეზება იყო“, – განაცხადა პროკურორმა.
ასევე ცნობილი გახდა, რომ საგამოძიებო უწყებას აქვს ფარული ჩანაწერი, რომელშიც ნია იმნაძისა და მისი მამის, ვალერი იმნაძის საუბარია ასახული და ისინი ალექსანდრე გაბაშვილის (მკვლელობის საქმის მთავარი ფიგურანტი) მიერ ჩადენილ დანაშაულს განიხილავენ.
„საუბარი მიმდინარეობს ნია იმნაძესა და მამამისს, ვალერი იმნაძეს შორის, თუმცა იქ ოჯახის სხვა წევრებიც იმყოფებიან. განიხილავდნენ როგორ ჩაიდინა დანაშაული ალექსანდრე გაბაშვილმა. ნიას მამა ამბობს, რომ ეს არ უნდა გაეკეთებინა და არასწორად მოიქცა. თუმცა მამას ეუბნება, რომ სხვანაირად ვერ მოიქცეოდა, რომ თანამედროვე ეპოქაში სხვანაირად ხდება გადაწყვეტილებების მიღება და ის არის ძველი თაობის წარმომადგენელი. მოკლედ, მამა-შვილს შორის კამათი მიმდინარეობს. მიმდინარეობს ნია იმნაძის მიერ თავისი აზრის გამოხატვა. ასევე, დემონსტრირებას ახდებს, რომ ის არა მხოლოდ ეთანხმება იმას, რაც მოხდა, არამედ …“, – განაცხადა პროკურორმა.
ორივე არასრულწლოვანი 5 აგვისტოს დააკავეს. ნია იმნაძეს ჯგუფურად ჯანმრთელობის განზრახ მძიმე დაზიანების წაქეზებას ედავებიან, რაც 13 წლამდე ვადით თავისუფლების აღკვეთას ითვალისწინებს. ანასტასია ბერუაშვილს კი განსაკუთრებით მძიმე დანაშაულის შეუტყობინებლობის ბრალდება წაუყენეს, რაც 7 წლამდე პატიმრობას გულისხმობს.
