აშშ-ის პრეზიდენტმა დონალდ ტრამპმა ირანის წინააღმდეგ მასშტაბური ეკონომიკური ომის დაწყების შესახებ განაცხადა.
„დღეს ვაცხადებ ყველაზე გამანადგურებელი ეკონომიკური ოპერაციის დაწყებას, რომელიც ოდესმე რომელიმე ქვეყნის წინააღმდეგ ჩატარებულა. ეს იქნება ეკონომიკური ომი და უპრეცედენტო მასშტაბის იზოლაცია“, — დაწერა ტრამპმა ხუთშაბათს, 20 აგვისტოს, საკუთარ სოციალურ ქსელ Truth Social-ში.
ამავე დროს ის „უზარმაზარი“ სანქციებით დაემუქრა ნებისმიერ ქვეყანას, რომელიც ირანს მხარს უჭერს ან მასთან ბიზნესს აწარმოებს.
„ჩვენ გვჭირდება ყველა ჩვენი მოკავშირის მხარდაჭერა, რათა ირანის საფრთხე იზოლაციაში მოვაქციოთ და დავამარცხოთ“, — აღნიშნა ტრამპმა.
აშშ-ის ოპერაცია „ეკონომიკური რისხვა“
აშშ-ს ირანის ნავთობის, საზღვაო გადაზიდვებისა და ფინანსური სექტორების წინააღმდეგ მასშტაბური სანქციები უკვე დაწესებული აქვს. ვაშინგტონი ცდილობს, თეირანს ენერგორესურსების ექსპორტიდან მიღებული შემოსავლები შეუზღუდოს.
ტრამპის ბოლო ნაბიჯი, როგორც ჩანს, წარმოადგენს ზეწოლის კამპანიის გაგრძელებას ოპერაცია „ეკონომიკური რისხვის“ ფარგლებში, რომლის დაწყებაც აშშ-მა აპრილის დასაწყისში გამოაცხადა.
18 აგვისტოს არაბთა გაერთიანებულმა საამიროებმა უკვე განაცხადეს ირანთან ყველა სავაჭრო, კომერციული და ფინანსური ოპერაციის დროებით შეჩერების შესახებ, შემდგომ გადაწყვეტილებამდე.
არაბთა გაერთიანებული საამიროების ხელისუფლებამ თეირანი ქვეყნის მიმართულებით ორი რაკეტის გაშვებაში დაადანაშაულა და განაცხადა, რომ თავდასხმის სამიზნე საზღვაო მიმოსვლა იყო.
ირანმა ეს ბრალდებები უარყო.