პოლიციამ დღეს, 1 სექტემბერს, ლისის ტბასთან, ბიზნესმენისა და ძაღლების თავშესაფრის ხელმძღვანელის, თამაზ ელიზბარაშვილის ავტომობილი გაჩხრიკა. ინფორმაციით, ის ოჯახთან ერთად გადაადგილებისას გააჩერეს.
შინაგან საქმეთა სამინისტროს ცნობით, საგამოძიებო მოქმედება მიმდინარეობს სისხლის სამართლის კოდექსის 151-ე (მუქარა) და 236-ე (ცეცხლსასროლი იარაღის უკანონო შეძენა, შენახვა და ტარება) მუხლებით დაწყებული გამოძიების ფარგლებში.
ჩხრეკის ვიდეო ელიზბარაშვილის თავშესაფრის Facebook გვერდზე პირდაპირი ეთერით გავრცელდა. ვიდეოში ჩანს, რომ გამომძიებელი ელიზბარაშვილს განუცხადებს, რომ „30-ში მომხდართან დაკავშირებით” საჩივრები არსებობს და აცხადებს, რომ საქმეზე მუქარის შესაძლო ფაქტთან დაკავშირებით მიმდინარეობს გამოძიება.
“30-ში რესტორან სხვაში ვიყავით მე და ჩემი მეუღლე, ტუალეტში ხელის დასაბანად ჩავედით, 8 კაცი მოვიდა, გადაკეტა კორიდორი და მეუბნებიან, ფეხს არ მოვიცვლით აქედან, სანამ ბოდიშს არ მოგვიხდიო, რატომ უნდა მოგიხადოთ ბოდიში, ვინ ხართ, არ გიცნობთ-მეთქი, ჩვენ TV იმედის თანამშრომლები ვართო, შენი პოზიცია არ მოგვწონს, უკრაინას მხარს რომ უჭერ და რუსებს, რომ აგინებო, არ “გვევასებიო” და ბოდიში უნდა მოგვიხადოო. ვუთხარი, ცოლს დავტოვებ სახლში ნახევარ საათში ჩამოვალ და დაგელაპარაკებით მეთქი, მეუღლე დავტოვე არც დამჭირდა ნახევარი საათი, 20 წუთში ჩამოვედი და ესენი გაიქცნენ, არცერთი არ დამხვდა და ახლა ესენი მიჩივიან მე?!” – ეუბნება ელიზბარაშვილი გამომძიებლებს.
თავად ელიზბარაშვილის თქმით, 30 აგვისტოს, ტბის მიმდებარედ მდებარე რესტორან „სხვაში”, მასთან სიტყვიერი დაპირისპირება ჰქონდათ პირებს, რომლებმაც საკუთარი თავი წარადგინეს, როგორც ტელეკომპანია „იმედის” თანამშრომლები — მისივე თქმით, პრეტენზია მისი პოზიციისა და უკრაინის მხარდაჭერის გამო ჰქონდათ და ბოდიშის მოხდას სთხოვდნენ. ელიზბარაშვილის განცხადებით, საკუთარი მხრიდან ბოდიშის მოხდის საფუძველს ვერ ხედავდა.
31 აგვისტოს ელიზბარაშვილმა სოციალურ ქსელში პოსტი გამოაქვეყნა, რომელშიც მითითებული პირებისგან „სხვაში” მომხდარზე ბოდიშის მოხდას მოითხოვდა.