ჩინეთი ცენტრალური აზიის შეიარაღების ბაზრიდან რუსეთს აძევებს და რეგიონის ქვეყნებს დრონებს, საბრძოლო თვითმფრინავებს, საჰაერო თავდაცვის სისტემებსა და ჯავშანტექნიკას აწვდის, –წერს გამოცემა Forbes
ყაზახეთმა უკვე შეიძინა ჩინური Wing Loong-1-ის დამრტყმელი უპილოტო საფრენი აპარატები და Y-8F-200-ის სატრანსპორტო თვითმფრინავები, ასევე განიხილავდა K-8W-ის სასწავლო-საბრძოლო თვითმფრინავების შეძენას.
უზბეკეთმა ჩინეთისგან ოთხი მრავალფუნქციური საბრძოლო თვითმფრინავი მიიღო და ასევე შეიძინა საჰაერო თავდაცვის სისტემები. ჩინური საზენიტო-სარაკეტო კომპლექსები შეიძინა თურქმენეთმაც, ტაჯიკეთმა მიიღო ჯავშანტექნიკა, ხოლო ყირგიზეთმა — სამხედრო მანქანები და აღჭურვილობა.
ამავე დროს, პეკინი სწრაფად ზრდის ეკონომიკურ გავლენასაც. ჩინეთის ვაჭრობის მოცულობა ყაზახეთთან, უზბეკეთთან, თურქმენეთთან, ტაჯიკეთსა და ყირგიზეთთან 2022 წელს არსებული 70 მილიარდ დოლარზე მეტი მაჩვენებლიდან 2025 წელს 106 მილიარდ დოლარამდე გაიზარდა.
ჩინეთისკენ გადახრის ერთ-ერთი მიზეზი უკრაინის წინააღმდეგ რუსეთის ომი გახდა. სანქციებმა რუსეთს უცხოურ კომპონენტებზე წვდომა შეუზღუდა და შეიარაღების წარმოება და მიწოდება გაურთულა, მაშინ როცა ჩინეთს შეუძლია რეგიონის ქვეყნებს სამხედრო ტექნიკა მსგავსი შეზღუდვების გარეშე შესთავაზოს.
მოსკოვი ჯერჯერობით მნიშვნელოვან პოლიტიკურ და ეკონომიკურ გავლენას ინარჩუნებს, თუმცა ჩინეთი თანდათან იკავებს ადგილს იმ სფეროში, სადაც რუსეთი ათწლეულების განმავლობაში თითქმის დომინირებდა – ცენტრალურ აზიაში იარაღით ვაჭრობასა და სამხედრო თანამშრომლობაში– წერს ფორბსი.