გერმანიის მმართველ კოალიციაში ავტომობილების მფლობელებზე მაღალი საწვავის ფასებით გამოწვეული ფინანსური ტვირთის შესამცირებლად საგანგებო ზომების შემოღების შეთავაზებით გამოდიან. ერთ-ერთი ასეთი ნაბიჯი შეიძლება იყოს 1 ოქტომბრიდან ბენზინსა და დიზელზე დამატებითი ღირებულების გადასახადის შემცირება, განაცხადა ბუნდესტაგში ქრისტიან-დემოკრატიული კავშირისა (CDU) და ქრისტიან-სოციალური კავშირის (CSU) ფრაქციის ლიდერმა თორსტენ ფრაიმ ოთხშაბათს, 16 სექტემბერს.
ნავთობისა და ნავთობპროდუქტების ფასების ზრდასთან ერთად, დღგ-ის საშუალებით სახელმწიფოს შემოსავლებიც იზრდება. „ამიტომ ლოგიკური იქნებოდა ამ თანხის ნაწილი მოქალაქეებისთვის დაგვებრუნებინა და დღგ 19%-ის ნაცვლად 7%-იანი განაკვეთით აგვეღო“, — მიიჩნევს ბუნდესტაგში კონსერვატორების ლიდერი.
მისი თქმით, ამისთვის დამატებითი დაფინანსების წყაროების მოძიება საჭირო არ იქნება, რადგან სახელმწიფო გადასახადის გადამხდელებს უბრალოდ დაუბრუნებს დღგ-ის ზრდით მიღებული დამატებითი შემოსავლების ნაწილს. თუმცა გერმანიის ფინანსთა სამინისტრომ მანამდე განაცხადა, რომ საწვავის გაძვირებას საგადასახადო შემოსავლების ზრდა არ მოჰყოლია.
ალტერნატივა -„საწვავის ფასდაკლების“ დაბრუნება
ფრაის თქმით, ალტერნატიული ვარიანტი შეიძლება იყოს „საწვავის ფასდაკლების“ დაბრუნება, რომელიც მმართველმა კოალიციამ აპრილის ბოლოს, ირანში ომის დაწყების შემდეგ საწვავის გაძვირების გამო შემოიღო და 1 მაისიდან 30 ივნისამდე მოქმედებდა.
რადგან ახლო აღმოსავლეთში ვითარების სწრაფ გაუმჯობესებას არ უნდა ველოდოთ, გერმანიის ხელისუფლება საწვავის ფასების ფორმირებაში უნდა ჩაერიოს – მიიჩნევს CDU/CSU-ს ფრაქციის ლიდერი. მისი თქმით, საჭიროა განხილვა, „როგორ ამოქმედდეს გადაუდებელი ზომები 1 ოქტომბრიდან“. მან გაიხსენა გასულ გაზაფხულზე ავტომობილების მფლობელებისთვის დაწესებული მოკლევადიანი შეღავათებიც და დასძინა, რომ დაუყოვნებელი მოქმედება ახლაც აუცილებელია.
მერცი საწვავის ფასების შესამცირებელი ზომების განხილვის პირობას დებს
მანამდე გერმანიის მმართველი კოალიცია მაღალი ხარჯების გამო საწვავზე ფასდაკლების ხელახლა შემოღების იდეას უარყოფდა. 15 სექტემბერს გერმანიის კანცლერმა ფრიდრიხ მერცმა პირობა დადო, რომ მაღალი საწვავის ფასებით გამოწვეული ფინანსური ტვირთის შესამცირებლად ზომებს მიიღებს.
მისი თქმით, მთავრობა „განიხილავს გადასახადებისა და მოსაკრებლების საკითხს“, რომლებიც საწვავის ღირებულებას ზრდის. მერცის განცხადებით, შესაბამისი წინადადება „ძალიან, ძალიან მალე“ უნდა გამოჩნდეს.