დღეს დილით, მოლდოვა-უკრაინის საზღვარზე ვითარება უკიდურესად დაიძაბა. უკრაინის სამოქალაქო ინფრასტრუქტურაზე რუსეთის მორიგი საჰაერო იერიშის დროს, ჭურვი მოლდოვის საზღვართან მდებარე „პალანკა-მაიაკი-უდობნეს“ სასაზღვრო გამშვებ პუნქტთან ჩამოვარდა, რიკოშეტით ასხლტა და პირდაპირ სასაზღვრო ბარიერთან მდგარ სამგზავრო ავტობუსსა და სასაზღვრო ჯიხურს დაეჯახა. ავტობუსში მყოფ მგზავრთაგან არავინ დაშავებულა, მსუბუქი დაზიანებები მიიღო მორიგე მესაზღვრემ.
„აფეთქების შედეგად, ნატეხებისგან მსუბუქი დაზიანებები მიიღო მოლდოვის სასაზღვრო პოლიციის თანამშრომელმა, რომელსაც პირველადი დახმარება ადგილზევე აღმოუჩინეს. ავტობუსში მყოფი მგზავრებიდან არავინ დაშავებულა. ჭურვმა დააზიანა ტრანსპორტი და კონტროლის კაბინა. უსაფრთხოების ზომებიდან გამომდინარე, პალანკის გამშვები პუნქტის მუშაობა სრულად შეჩერებულია“ – აცხადებს მოლდოვას სასაზღვრო პოლიცია.
ორი დღის წინ, 3 ოქტომბერს, რუსულმა რაკეტებმა და დრონებმა რამდენჯერმე დაარღვიეს მოლდოვას საჰაერო სივრცე. მოხდა აფეთქებები, რის გამოც მოლდოვის საგარეო საქმეთა სამინისტრომ რუსეთის ელჩი, ოლეგ ოზეროვი, სასწრაფოდ დაიბარა და პროტესტის მკაცრი ნოტა გადასცა. თუმცა ელჩმა განაცხადა, რომ ყელში ამოუვიდათ უსაფუძვლო ბრალდებები. საპასუხოდ, მოლდოვის თავდაცვის მინისტრმა განაცხადა, რომ აგრესიის ყველა მტკიცებულება პირდაპირ მათ მიწაზე დევს.
მოლდოვის პრეზიდენტმა, მაია სანდუმ კი ბოლო დღეების თავდასხმებზე საკუთარ X გვერდზე დაწერა, რომ რუსეთის ომი საშიშად ვრცელდება უკვე მოლდოვაზე და მოსკოვი, რომელიც უკვე მთელს ევროპაში საფრთხეს უქმნის ადამიანების სიცოცხლეს, უნდა შეაჩერონ.
მოლდოვას საპატრულო პოლიციამ პალანკის მიმართულებით მიმავალი გზები ჩაკეტა, რათა შემთხვევის ადგილზე საგამოძიებო მოქმედებები უსაფრთხოდ ჩატარდეს. უწყებები მოქალაქეებს მოუწოდებენ, თავი შეიკავონ აღნიშნული მიმართულებით მგზავრობისგან.