2026 წლის 30 ოქტომბრის მდგომარეობით, უკრაინის ომში რუსეთის მხრიდან დაღუპულთა რაოდენობამ შესაძლოა 500 ათას ადამიანს გადააჭარბა. ამის შესახებ მეტყველებს მონაცემები, რომლებსაც ერთობლივად აგროვებენ BBC-ის რუსული სამსახურის, „მედიაზონის“ ჟურნალისტები და მოხალისეთა გუნდი. მათი უახლესი შედეგები პარასკევს, 30 ოქტომბერს გამოქვეყნდა. ამასთან, სახელობითად დადგენილია რუსეთის შეიარაღებული ძალების 285 023 დაღუპული სამხედრო მოსამსახურე.
BBC-ის ცნობით, ღია წყაროებით დადასტურებული სახელების მქონე დაღუპული რუსი სამხედროები რუსეთის არმიაში რეალურად დაღუპულთა საერთო რაოდენობის დაახლოებით 45-55 პროცენტს შეადგენენ. შესაბამისად, სამხედრო ექსპერტების შეფასებით, რუსეთის არმიაში დაღუპულთა რეალური რაოდენობა შესაძლოა 518 224-დან 663 384 ადამიანამდე იყოს.
თუ ამ მაჩვენებლებს დავუმატებთ თვითგამოცხადებული „დონეცკის სახალხო რესპუბლიკისა“ („დნრ“) და „ლუგანსკის სახალხო რესპუბლიკის“ („ლნრ“) დანაყოფებში მებრძოლთა დანაკარგებს, რომლებიც 21 000-23 500 ადამიანად არის შეფასებული, ასევე დაღუპული ჩრდილოკორეელი სამხედროების დადგენილ 2 304 სახელს, მაშინ პრორუსული ძალების საერთო დანაკარგი შესაძლოა 541 528-დან 689 188 სამხედრო მოსამსახურემდე მერყეობდეს.
დაღუპული რუსი სამხედროების ზუსტი რაოდენობის დადგენას მნიშვნელოვნად ართულებს ის გარემოება, რომ მათი დაღუპვის შესახებ ინფორმაცია სრულად საჯაროდ ხელმისაწვდომი არ არის.
„მედიაზონისა“ და BBC-ის რუსული სამსახურის ჟურნალისტები, მოხალისეთა გუნდთან ერთად, 2022 წლის თებერვალში რუსეთის მიერ უკრაინაში შეჭრის პირველივე დღიდან აღრიცხავენ მედიაში, სოციალურ ქსელებსა და სახელმწიფო უწყებების ვებგვერდებზე გამოქვეყნებულ ცნობებს რუსი სამხედროების დაღუპვის შესახებ.