უმრავლესობის რიგების შემცირების შემდეგ მალე სავარაუდოდ პარლამენტში პატრიოტთა ალიანსის ფრაქციაც დაიშლება. ოცნებიდან წამოსული ეკა ბესელია ფრაქციის შექმნაზე მუშაობს . ამისათვის ჯამში 6 დეპუტატია საჭირო, რომელთაგან ერთი დიდი ალბათობით ქართული ოცნებიდან რამდენიმე თვის წინ გარიცხული დავით ჭიჭინაძე იქნება. ქართული ოცნებიდან გარიცხვის შემდეგ დავით ჭიჭინაძე დროებით პატრიოტთა ალიანსში გაერთიანდა, რომელიც შემოდგომაზე ფრაქციის დაშლის საფრთხის წინაშე აღმოჩნდა, როცა დეპუტატმა ნატო ჩხეიძემ პატრიოტთა რიგები დატოვა. სწორედ დავით ჭიჭინაძე აღმოჩნდა ის მეექვსე დეპუტატი, რომელიც ნატო ჩხეიძეს ჩაენაცვლა და პატრიოტებს ფრაქცია გადაურჩინა. ის თავიდანვე არ მალავდა, რომ ეს მხოლოდ ტექნიკური სახის დახმარება იყო და პატრიოტთა რიგებში დროებით ირიცხებოდა, სანამ შემცვლელს არ მოუძებნიდნენ. ვადა როგორც ჩანს ამოიწურა, რადგან ჭიჭინაძემ ფრაქციის დატოვება უკვე ოფიციალურად გადაწყვიტა. პატრიოტებმა კი ჭიჭინაძის შემცვლელი ჯერჯერობით ვერ იპოვნეს. პატრიოტთა ალიანსის 5 დეპუტატი კი ფრაქციის არსებობისთვის საკმარისი აღარ იქნება. თუმცა არ არის გამორიცხული პატრიოტთა ალიანსს ბიძინა ივანიშვილი დაეხმაროს და უმრავლესობის რომელიმე წევრი მათ ფრაქციაში გაერთიანებაზე დაითანხმოს, რათა პატრიოტებმა პარლამენტში ფრაქციის შენარჩუნება შეძლონ, ყველა თანმდევი პრივილეგიით.
დავით ჭიჭინაძის გარდა ამჟამად პატრიოტთა ალიანსის ფრაქციის – “საქართველოს პატრიოტების“ წევრები არიან: ირმა ინაშვილი, ემზარ კვიციანი, ადა მარშანია, გიორგი ლომია, გელა მიქაძე.
