“უანგარო მსახურება” – დოკუმენტური ფილმი, რომელიც განდეგილი ბერების შესახებ ემის მფლობელმა ჰოლივუდელმა რეჟისორმა ჯეიმს ჰიგინსონმა ორი წლის წინ გადაიღო, ქართველი მაყურებლის ფართო აუდიტორიისთვის კვლავ არ არის ხელმისაწვდომი. ჯეიმს ჰიგინსონმა ნამუშევარი მის მიერ მოპოვებული სახსრებით შექმნა, ამჟამად კი, დაფინანსებისა და ტელევიზიების მხრიდან ფილმით დაინტერესების მოლოდინშია.ჰიგინსონმა Newsreport.ge-თან ინტერვიუში თქვა, რომ განდეგილ ბერებზე შექმნილმა ფილმმა უკვე მოიპოვა მნიშვნელოვანი საერთაშორისო ჯილდო (IndieFEST Film Awards). ჰიგინსონის თქმით, “უანგარო მსახურება” მორიგ წარმატებას ელის.
როგორც ცნობილია, 90-წუთიანი ფილმი რუის-ურბნისის ეპარქიაში გადაიღეს, მეუფე იობისა და პატრიარქის კურთხევით. გადაღებები 4 წლის განმავლობაში მიმდინარეობდა, რადგან სამუშაოების წარმოებისთვის საჭირო დაფინანსების მოპოვებაზე თავად რეჟისორი ზრუნავდა. “უანგარო მსახურების” ნახვა ქართველი მაყურებლისთვის ჯერ მხოლოდ ინტერნეტით არის შესაძლებელი. მისი ჩამოტვირთვა ფასიანია.
