საქართველოს მესამე პრეზიდენტი, მიხეილ სააკაშვილი აცხადებს, რომ არჩევნების შემდეგ ვერ ხედავს პარტიულ კოალიციას. მისი თქმით, არ სჯერა “პარტიების და პარტიუკების”.
კითხვაზე, ხედავს თუ არა კოალიციური მთავრობის აუცილებლობას, სააკაშვილი ასე პასუხობს:,,მე ვხედავ კოალიციას საზოგადოებას, მე საერთოდ არ ვხედავ პარტიულ კოალიციას, მე საერთოდ არ მჯერა პოლიტიკური პარტიების და პარტიუკების. საერთოდ არ მჯერა, ზოგადად, პოლიტიკანობის და პოლიტიკოსობის ვიწრო გაგებით. მე მჯერა სახელმწიფოებრივი აზროვნების, მე მჯერა ინოვაციების, მე მჯერა ფართო ხედვის და პატრიოტიზმის, მე მჯერა ფართო საზოგადოებრივი ძალების გაერთიანების”,– ამბობს სააკაშვილი ტვ პირველთან ინტერვიუში.
მისივე განცხადებით, ან ნაციონალური მოძრაობა მოიპოვებს უმრავლესობას, ან საქართველო დაიღუპება.
“ამ არჩევნებზე ან აიღებს უმრავლესობას ნაციონალური მოძრაობა, ან საქართველო დაიღუპება, ეს ერთი. მეორე, მერე, რა თქმა უნდა, ჩვენი გამარჯვების შემდეგ, საქართველო არ დაიღუპება, ჩვენ გავიმარჯვებთ, იქნება ფართო საზოგადოებრივი ინტერესებით წარმოდგენილი მთავრობა. იქ იქნება შეიძლება რაღაც პარტიებიც, მაგრამ ფართო საზოგადოება. საზოგადოება ბევრად უფრო მაღლა დგას, ვიდრე ცალკეული ადამიანების პარტიული გაერთიანებები. საერთოდ ბოლომდე არ მჯერა მე პარტიული სტრუქტურების”,– ამბობს სააკაშვილი.
ექსპრეზიდენტი აღნიშნავს, რომ ნაციონალური მოძრაობა “სპეციფიური მოვლენაა”, ეს არის თანამოაზრეთა ჯგუფი.
