ანტისაჰაერო სისტემის შესყიდვაზე საქართველოსა და საფრანგეთს შორის ახალი კონტრაქტი გაფორმდება. ამ მიზნით საქართველოს თავდაცვის მინისტრი ლევან იზორია საფრანგეთში გაემგზავრა.
მანამდე მინისტრმა 6 დეკემბერს თავდაცვის სამინისტროში საქმიანობის ანგარიშის პრეზენტაციაზე განაცხადა, რომ ანტისაჰაერო სისტემები საქართველოს თავდაცვის ერთ-ერთი პრიორიტეტული მიმართულებაა.
“გაფორმდება ახალი კონტრაქტი ანტისაჰაერო სისტემის შესყიდვასთან დაკავშირებით ფრანგულ მხარესთან. ეს პროცესი გრძელდება და ეს არის ერთ-ერთი პრიორიტეტული მიმართულება. ანტისაჰაერო სისტემის ფარგლებში პირველი შეიარაღება მივიღეთ და უკვე ავამოქმედეთ“, თქვა ლევან იზორიამ.
ანტისაჰაერო სისტემის შესყიდვის პირველი ეტაპი დასრულებულია, მეორე ფაზა კი, თავდაცვის მინისტრის, ლევან იზორიას საფრანგეთში ჩასვლისთანავე დაიწყება.
როგორც თავდაცვის სამინისტროს ინფორმაციიდან ირკვევა, საქართველოში უკვე ჩამოვიდა პასიური სისტემები და ტაქტიკური საჰაერო თავდაცვის სისტემა “მისტრალი“, შემდეგ ეტაპზე კი, ქვეყანას მართვისა და კონტროლის უახლესი სისტემა გადმოეცემა.