გაგრის აღების დღეს – 2 ოქტომბერს, იტალიის სენატში დოკუმენტური ფილმის – „დავიწყებული მსხვერპლი: ბუჩამდე იყო აფხაზეთი“ – ჩვენება გაიმართა, რომელიც აფხაზეთში რუსეთის მიერ ქართველების წინააღმდეგ ჩადენილი დანაშაულების გენოციდად აღიარების კამპანიის ნაწილია.
ფილმი შექმნილია იმისათვის, რომ საერთაშორისო საზოგადოებას შეახსენოს — ვიდრე უკრაინაში – მაგალითად, ბუჩაში – სისასტიკე მოხდებოდა, მსგავსი ომი და ეთნიკური წმენდა რუსეთმა საქართველოს წინააღმდეგ აფხაზეთში განახორციელა. ფილმი საარქივო მტკიცებულებებსა და აფხაზეთში რუსეთის მიერ ჩადენილი დანაშაულების მსხვერპლთა ისტორიებს აერთიანებს.
იტალიის საკანონმდებლო ორგანოს ზედა პალატაში ფილმის ჩვენების შემდეგ გაიმართა დისკუსიაც, რომელშიც ფედერალისტების ლიდერი გიგა ბოკერია და იტალიის მმართველი და ოპოზიციური პარტიების წარმომადგენლები მონაწილეობდნენ. ასევე ჟურნალისტი და ანალიტიკოსი ჯაკომო ფერარა, რომელიც 2025 წელს საქართველოში საპროტესტო აქციის გაშუქებისას 5 000 ლარით დააჯარიმეს. მოგვიანებით კი, როცა სომხეთიდან საქართველოში შემოსვლას ცდილობდა, ჯარიმის გადაუხდელობის გამო, ქვეყანაში არ შემოუშვეს.
„სამწუხაროდ, ამ დოკუმენტურ ფილმს არც ტელევიზიით ვხედავთ და არც კინოთეატრებში. თუმცა, ის სხვადასხვა ადგილას მოგზაურობს, უკვე რამდენიმე ჩვენება გაიმართა და, ვფიქრობ, მომავალშიც არაერთი გაიმართება. თუ რჩევის მოცემის უფლება მაქვს, საქართველოში დარჩენილი ადამიანებისთვის საუკეთესო სამსახური სწორედ ასეთი საქმიანობის გაგრძელებაა. დღეს საქართველოში ძალიან ბევრი ადამიანი დაიღალა – ადამიანები, რომლებიც ყოველდღიურად აქციებზე იდგნენ და ამისთვის თავისუფლების ფასიც გადაიხადეს, ზოგიერთ შემთხვევაში კი თავისუფლება დროებით დაკარგეს. ზოგი კვლავ ციხეშია. მზია ამაღლობელი მხოლოდ ერთი მაგალითი და აისბერგის მწვერვალია. სხვებმა საფასური პირდაპირ საკუთარი ჯიბიდან გადაიხადეს. თქვენ კარგად იცით, რომ ზოგიერთ ადამიანს ჩემზე დაკისრებულ თანხაზე ხუთჯერ მეტი ჯარიმა გამოუწერეს. მე ჩემი ჯარიმის აღიარებაზე უარი ვთქვი, რადგან დამოუკიდებელი ჟურნალისტიკისა და საკუთარი საქმიანობის ღრმად მწამს“ – თქვა დისკუსიისას სამხრეთ კავკასიისა და ცენტრალური აზიის საკითხებზე მომუშავე ჟურნალისტმა და ანალიტიკოსმა ჯაკომო ფერარამ.
სენატორმა მარკო ლომბარდომ კი ხაზი გაუსვა, რომ საქართველოსა და უკრაინაში დატრიალებული ტრაგედიები ერთი დანაშაულებრივი გეგმის ნაწილია.
„1990-იან წლებში, 2008 წელსა და 2014 წელს მომხდარ მოვლენებს ერთი ხაზი აერთიანებს. ის ერთმანეთთან აკავშირებს სხვადასხვა ხალხისა და სახელმწიფოს თავს დატეხილ ტრაგედიებს, რომლებიც ერთი დანაშაულებრივი გეგმის ნაწილია. ყოველ ჯერზე, როცა ამ მოვლენებს ერთმანეთთან არ ვაკავშირებთ, გვგონია, რომ ყველაფერი გარდაუვალი იყო: აფხაზეთი გარდაუვალი იყო, ბუჩა გარდაუვალი იყო და ისიც გარდაუვალია, რაც დღეს უკრაინაში ხდება. თუმცა, პოლიტიკის მოვალეობა მოვლენების გარდაუვალობის შეჩერებაა, რადგან მან ისინი წინასწარ უნდა გააანალიზოს და დროულად იმოქმედოს. დღეს ამ კადრების ნახვა, უპირველესად, ჩვენ, ევროპელებს უნდა დაგვეხმაროს იმის გააზრებაში, რომ თუ უკრაინაში მიმდინარე სამხედრო აგრესიას ვერ შევაჩერებთ, ხვალ იგივე ესტონეთსა და პოლონეთში მოხდება. სწორედ ამიტომ უნდა ვიყოთ შეუვალი იმ საკითხში, რომ არსებობს რაღაცები, რომლებიც მოლაპარაკების საგანი ვერ გახდება. სამხედრო აგრესია მოლაპარაკების საგანი ვერ იქნება” – თქვა სენატორმა მარკო ლომბარდომ.
„საქართველომ დასავლეთის დუმილისა და დანაშაულებრივი გულგრილობის ფასი გადაიხადა. დიდხანს გვეგონა, რომ რუსეთთან ურთიერთობას ეკონომიკის საფარქვეშ გავატარებდით. გვეგონა, რომ ეკონომიკურ დონეზე ურთიერთობა შეგვეძლო, რადგან მეორე – პოლიტიკური და ჰუმანიტარული მხარე იმდენად აუტანელი იყო, მასზე საუბარიც გვიჭირდა. ამიტომ ვამბობდით: მოდით, მათთან ბიზნესი ვაკეთოთ და ასე ჩვენს სამყაროში მოვიზიდავთ. ამან არა მხოლოდ არ იმუშავა, არამედ გზა გაუხსნა. მათ კი სწორედ ეს სურთ. საქართველოს ხელისუფლებასთან ურთიერთობის ნორმალიზებას სიფრთხილით უნდა მოვეკიდოთ. ჟურნალისტები, აქტივისტები, პროფკავშირის წარმომადგენლები და პარტიის ლიდერები უკვე ასობით დღეა, ყოველ ღვთისგან ბოძებულ დღეს რუსთაველის გამზირზე გამოდიან. ამიტომ ამ ქართულ რეჟიმთან არავითარი ნორმალიზება არ შეიძლება“ – აღნიშნა იტალიის დემოკრატიული პარტიის სენატორმა ფილიპო სენსიმ.
იტალიის მმართველი პარტიის დეპუტატმა ფრანჩესკო ფილინიმ კი განაცხადა, რომ „ბუჩამდე იყო აფხაზეთს“ და მსგავს დოკუმენტურ ფილმებს ტელევიზიებიც უნდა აჩვენებდნენ, რადგან ეს ადამიანებს საერთო სურათის გააზრებაში დაეხმარება.
„მნიშვნელოვანია მსგავსი დოკუმენტური ფილმების გავრცელება და ისტორიის იმ მრავალი ხაზის ერთმანეთთან დაკავშირება, რომლებმაც უკრაინის დღევანდელ ტრაგედიამდე მიგვიყვანა. წარსულის დანაშაულები არ უნდა დავივიწყოთ, რადგან ისინი გვეხმარება გავიაზროთ, რა დევს სასწორზე. ამაზე ხშირად არ საუბრობენ, რადგან არ ესმით, რა არის ნამდვილი ფსონი, რომელიც დღეს უკრაინაში და სხვა საერთაშორისო არენებზე წყდება. ადამიანები რომ აცნობიერებდნენ, რამდენად მაღალია ფსონი და რომ საქმე მხოლოდ დონბასს, ყირიმს ან ხვალ, შესაძლოა, ბალტიის რომელიმე რესპუბლიკასა თუ პოლონეთს არ ეხება, საკითხს სხვაგვარად შეხედავდნენ. ეს მხოლოდ ტერიტორიული აგრესია ან რომელიმე ქვეყნის ტერიტორიის ნაწილის მიტაცება არ არის. სასწორზე გაცილებით მეტი რამ დევს – ჩვენი მომავალი, ჩვენი ღირებულებათა სისტემა და, უპირველესად, თავისუფლება. უკრაინის დახმარებით ქველმოქმედებას არ ვეწევით – ამით საკუთარ ღირებულებებს კვლავ ვადასტურებთ და ვიცავთ. უპირველესად კი ვეხმარებით მათ, ვინც დღეს ამ ღირებულებებს იცავს. უკრაინაში, საქართველოში და მსოფლიოს მრავალ სხვა ნაწილში არიან ადამიანები, რომლებმაც საკუთარ თავზე გამოსცადეს დიქტატურის ტერორი, რეპრესია და თავისუფლების არქონა. დღეს ისინი თავისუფლებისთვის ისევე იბრძვიან, როგორც წარსულში ევროპელები და იტალიელები იბრძოდნენ. არავითარ შემთხვევაში არ გვაქვს უფლება, ზურგი ვაქციოთ ან სარგებელი ვითვალოთ, როგორც ამას ხშირად სულმდაბლად აკეთებენ“ – განაცხადა იტალიის მმართველი Fratelli d’Italia-ს დეპუტატმა და პარტიის პროგრამის დეპარტამენტის ხელმძღვანელმა, ფრანჩესკო ფილინიმ რომის სენატში გამართული დისკუსიისას.
რუსეთის მიერ ქართველების წინააღმდეგ ჩადენილი დანაშაულების გენოციდად აღიარების კამპანიას ფედერალისტები, აფხაზთა კრება, თავისუფლების ინსტიტუტი და ტაბულა 2022 წლიდან აწარმოებენ. მას შემდეგ გამოფენები და ფილმის სხვადასხვა ვერსიის ჩვენებები საქართველოს არაერთ ქალაქში, აშშ-ს კონგრესში, საფრანგეთის ეროვნულ ასამბლეასა და სხვა დასავლურ ინსტიტუტებში გაიმართა. კამპანიის მიზანია, აფხაზეთში ქართველების წინააღმდეგ ჩადენილი დანაშაულების გენოციდად აღიარება როგორც საქართველოს სახელმწიფოს, ისე საერთაშორისო თანამეგობრობის მიერ.