ისრაელის საგარეო საქმეთა მინისტრმა გიდეონ საარმა განაცხადა, რომ ევროკავშირის დიპლომატიის ხელმძღვანელ კაია კალასთან კონტაქტებს წყვეტს. ხუთშაბათს, 18 ივნისს, სოციალურ ქსელ X-ში გამოქვეყნებულ განცხადებაში მან ეს პრესაში გავრცელებული კალასის გამონათქვამით ახსნა, სადაც, მისი თქმით, კალასმა ებრაული სახელმწიფო აპარტეიდის დროინდელ სამხრეთ აფრიკას შეადარა.
„ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში უკვე გარკვეული დროა, ისრაელის სახელმწიფოს მიმართ აკვიატებულად და აშკარა უსამართლობით მოქმედებს. ახლახან ცნობილი გახდა, რომ მექსიკაში ვიზიტის დროს მან ისრაელი სამხრეთ აფრიკაში არსებულ რასისტულ აპარტეიდის რეჟიმს შეადარა“, — განაცხადა საარმა.
მისი თქმით, მას „სხვა არჩევანი არ აქვს, გარდა იმისა, რომ ქალბატონ კალასთან ყველა კონტაქტი გაწყვიტოს, სანამ ის ამ სისხლიან ცილისწამებას უკან არ წაიღებს“.
ევროპული საინფორმაციო პორტალი Euractiv 12 ივნისს, ანონიმურ ოფიციალურ პირებსა და დიპლომატებზე დაყრდნობით, იტყობინებოდა, რომ გასულ თვეში მექსიკის მთავრობის წარმომადგენლებთან შეხვედრების დროს კალასმა ისრაელის დამოკიდებულება პალესტინელების მიმართ დასავლეთ სანაპიროსა და ღაზის სექტორში შეადარა რასობრივი სეგრეგაციის პოლიტიკას, რომელიც სამხრეთ აფრიკაში 1948 წლიდან 1994 წლამდე მოქმედებდა.
კალასმა ისრაელის საგარეო საქმეთა მინისტრს „პატივისცემითა და კონსტრუქციულად“ დიალოგისკენ მოუწოდა.
გიდეონ საარის პუბლიკაციაზე პასუხად, კაია კალასმა განაცხადა, რომ ევროკავშირს კვლავ სურს ისრაელთან კონსტრუქციული ურთიერთობების შენარჩუნება.
„მე ვაფასებ ჩვენს დიალოგსა და თანამშრომლობას და მზად ვარ, ისინი იმავე სულისკვეთებით — პატივისცემითა და კონსტრუქციულად — გავაგრძელო. დიალოგი დიპლომატიის საფუძველია, განსაკუთრებით მაშინ, როდესაც უთანხმოება ჩნდება“, — დაწერა მან X-ში, ისრაელის საგარეო საქმეთა მინისტრისადმი მიმართვისას.
ამასთან, შეახსენა, რომ ევროკავშირის პოზიციის თანახმად, ორი სახელმწიფოს შექმნის გადაწყვეტა ახლო აღმოსავლეთში მშვიდობისკენ „ერთადერთ სიცოცხლისუნარიან გზად“ რჩება.
რამდენიმე წუთში კალასის განცხადებას საარი გამოეხმაურა. მან აღნიშნა, რომ ევროკავშირის დიპლომატიის ხელმძღვანელს X-ში გამოქვეყნებულ პოსტში არ უარყვია და არ დაუგმია განცხადება აპარტეიდის შესახებ.
„ეს თავისთავად ბევრს ამბობს. რამდენადაც ჩემთვის ცნობილია, განცხადებები „აპარტეიდის“ შესახებ, რომლებიც თქვენ მოგეწერებათ, ევროკავშირის პოზიციას არ ასახავს“, — დაწერა ისრაელის საგარეო საქმეთა მინისტრმა და დაამატა, რომ სანამ ეს საკითხი არ გაირკვევა, მისი გადაწყვეტილება „უცვლელი დარჩება“.
გერმანიის კანცლერი მერცი აპარტეიდთან შედარებას უარყოფს.
გერმანიის კანცლერმა ფრიდრიხ მერცმა კატეგორიულად უარყო ისრაელის შედარება სამხრეთ აფრიკის აპარტეიდის რეჟიმთან.
„კატეგორიულად არ ვეთანხმები სიტყვების ასეთ შერჩევას და ამის უფრო დეტალურად განხილვა მოგვიწევს“, — განაცხადა მან ბრიუსელში, ევროკავშირის სამიტზე ჩასვლისას.
dpa-ს მიერ ციტირებული მერცის განცხადებით ევროკავშირის ლიდერები ამ საკითხს განიხილავენ.