რუსეთის საგარეო საქმეთა სამინისტროს პრესსპიკერმა მარია ზახაროვამ თბილისში, პუშკინის სკვერში გამართული ანტირუსული აქციის მონაწილეებს „ექსტრემისტები“ უწოდა და საქართველოს სამართალდამცავ ორგანოებს მომხდარზე რეაგირებისკენ მოუწოდა. ზახაროვას განცხადება უკავშირდება 6 ივნისს, თბილისში, პუშკინის სკვერში მომხდარ მოვლენებს, სადაც რუსეთის ინტერესების სექციის წარმომადგენლები ალექსანდრე პუშკინის დაბადების დღესა და „რუსული ენის დაცვის დღეს“ აღნიშნავდნენ. ღონისძიება სამოქალაქო აქტივისტებმა, კერძოდ, მოძრაობა „ქართული რესპუბლიკის“ წევრებმა ანტირუსული ლოზუნგებით გააპროტესტეს, რამაც კრემლის გაღიზიანება გამოიწვია.
„ეს ექსტრემისტების ჯგუფი იყო. მათ მანკიერ ქმედებებზე დეტალურად არ შევჩერდები, რომ ამ ყველაფრის რეკლამირება არ გამომივიდეს. რუსული ენის დღე საქართველოს კულტურული მემკვიდრეობის, ქართველი ხალხისა და ქართული კულტურის განუყოფელ ნაწილად, ერებს შორის მეგობრობისა და ურთიერთგაგების სიმბოლოდ იქცა. ჩვენ ველით, რომ საქართველოს სამართალდამცავი ორგანოები გამოიტანენ დასკვნებს და მისცემენ შესაბამის შეფასებას ამ რადიკალების, ექსტრემისტების თუ ხულიგნების ქმედებებს. შესაბამისი კვალიფიკაციის დადგენა საქართველოს სამართალდამცავ ორგანოებზეა დამოკიდებული“ — განაცხადა ზახაროვამ.
მან იქვე პარალელი გაავლო ბათუმთან და აღნიშნა, რომ ანალოგიური ღონისძიება აჭარაში, ქართველი სკოლის მოსწავლეებისა და პედაგოგების მონაწილეობით, ყოველგვარი ექსცესების გარეშე ჩატარდა. „მნიშვნელოვანია, რომ იმავე დღეს, ბათუმში, ყოველგვარი ინციდენტების გარეშე, მსგავსი ღონისძიება გაიმართა, რომელშიც მონაწილეობა მიიღეს ქართული სკოლების მოსწავლეებმა და მასწავლებლებმა. არანაკლებ მნიშვნელოვანია, რომ ზეიმის დროს პუშკინის საქართველოსადმი მიძღვნილი ნაწარმოებები წაიკითხეს. რა საოცარი სტრიქონები მიუძღვნა მან ამ ადგილებს!“ – ამბობს ზახაროვა