კიევი ოთხშაბათის, 1 ივლისის გვიანი საღამოდან რუსეთის მასირებული სარაკეტო და დრონებით შეტევის სამიზნე გახდა. ადგილობრივი ხელისუფლების ცნობით, თავდასხმის შედეგად დაიღუპა 10 ადამიანი, მინიმუმ 56 კი დაშავდა.
კიევის საქალაქო სამხედრო ადმინისტრაციის ხელმძღვანელის, ტიმურ ტკაჩენკოსა და ქალაქის მერის, ვიტალი კლიჩკოს ინფორმაციით, დაზიანებულია საცხოვრებელი მრავალსართულიანი კორპუსები, სასწრაფო დახმარების ქვესადგური და სასტუმრო.
შევჩენკოს რაიონში დარტყმის ქვეშ მოყვა სასწრაფო დახმარების ქვესადგური. დაშავებულებს შორის სულ მცირე ხუთი ადამიანი სასწრაფოს მძღოლი და მედიკოსია. კლიჩკოს თქმით, ამავე რაიონში ხანძარი გაჩნდა სასტუმროს სახურავსა და ბაზრობაზე.
გოლოსეევსკის რაიონში საცხოვრებელი კორპუსის სახურავი იწვის. დესნიანსკის რაიონში დაზიანდა 9-სართულიანი სახლი, რის გამოც ადამიანები შენობაში აღმოჩნდნენ ჩაკეტილები. იქვე ჩამოვარდა უპილოტო საფრენი აპარატის ნამსხვრევებიც კერძო სახლთან ახლოს.
დარნიცკის რაიონში ერთ-ერთ ბინაში ადამიანები ჩაკეტილები აღმოჩნდნენ. ამავე რაიონში ნაწილობრივ ჩამოინგრა ხუთსართულიანი შენობა და რამდენიმე კერძო სახლს ცეცხლი გაუჩნდა.
ტიმურ ტკაჩენკოს ინფორმაციით, დაზიანებები და ნგრევა დაფიქსირდა კიევის ყველა რაიონში, 30-ზე მეტ ლოკაციაზე. ხანძრები გაჩნდა სოლომენსკისა და სვიატოშინოს რაიონებშიც, დარტყმები კი ობოლონისა და პოდოლის რაიონებზეც განხორციელდა.
ტკაჩენკომ კიევზე შეტევის დაწყების შესახებ პირველი შეტყობინება Telegram-არხზე ადგილობრივი დროით 20:43-ზე გამოაქვეყნა. მისი თქმით, დრონები დედაქალაქს რამდენიმე მიმართულებიდან უახლოვდებოდნენ.
რუსეთის თავდაცვის სამინისტრომ განაცხადა, რომ რუსეთის შეიარაღებულმა ძალებმა კიევზე „შორ მანძილზე მოქმედი მაღალი სიზუსტის იარაღით“ მიიტანეს დარტყმა. მოსკოვის მტკიცებით, ეს იყო პასუხი „სამოქალაქო ინფრასტრუქტურაზე ტერორისტულ თავდასხმებზე“.
რუსეთის თავდაცვის უწყება ასევე ამტკიცებს, რომ კიევსა და კიევის ოლქში დარტყმები განხორციელდა სამხედრო მრეწველობის საწარმოებსა და საწვავ-ენერგეტიკული კომპლექსის ობიექტებზე, ხოლო დნეპროპეტროვსკის, პოლტავის, ჩერკასის, ჩერნიგოვისა და კიევის ოლქებში — სამხედრო აეროდრომების ინფრასტრუქტურაზე.
რუსეთის შესაძლო მასირებული შეტევის შესახებ უკრაინის პრეზიდენტმა ვოლოდიმირ ზელენსკიმ 1 ივლისის საღამოს გააფრთხილა. ის იმ დროს დუბლინში იმყოფებოდა, სადაც ირლანდიის ევროკავშირის საბჭოს თავმჯდომარეობის გახსნის ცერემონიაში მონაწილეობდა. ზელენსკიმ, დაზვერვის მონაცემებზე დაყრდნობით, უკრაინაზე რუსეთის შესაძლო მასირებული დარტყმის შესახებ განაცხადა.
მონიტორინგის რესურსებზე დაყრდნობით, განსაკუთრებულ საფრთხედ სახელდებოდა კიევი და კიევის ოლქი, ასევე დნეპრო და დნეპროპეტროვსკის ოლქი. მიზეზად ის დასახელდა, რომ რუსეთი ამ რეგიონებში ობიექტების აქტიურ დაზვერვას აწარმოებდა.
უკრაინული მედიის ცნობით, კიევში მნიშვნელოვნად გაიზარდა იმ ადამიანების რაოდენობა, რომლებმაც ღამის გატარება მეტროში გადაწყვიტეს, რათა შესაძლო დარტყმებს შეფარებოდნენ. დედაქალაქში საჰაერო განგაში რამდენიმე საათის განმავლობაში გრძელდებოდა, ხოლო ღამის შემდეგ ეტაპზე სარაკეტო შეტევასაც ელოდნენ.
