რუსეთის საგარეო საქმეთა სამინისტრომ საქართველოს, აფხაზეთსა და სამხრეთ ოსეთს შორის ძალის გამოუყენებლობის შესახებ იურიდიულად სავალდებულო შეთანხმების დადება მოსთხოვა. ამის შესახებ უწყებამ ჟენევის საერთაშორისო დისკუსიების 67-ე რაუნდის დასრულების შემდეგ განაცხადა.
მოლაპარაკებები 30 ივნისს და 1 ივლისს ჟენევაში გაიმართა. მასში აფხაზეთის, საქართველოს, სამხრეთ ოსეთის, რუსეთისა და აშშ-ის წარმომადგენლები მონაწილეობდნენ, თანათავმჯდომარეობდნენ კი გაერო, ეუთო და ევროკავშირი.
„30 ივნისს – 1-ელ ივლისს ჟენევაში გაიმართა სამხრეთ კავკასიაში უსაფრთხოებისა და სტაბილურობის შესახებ საერთაშორისო დისკუსიების (GID) 67-ე რაუნდი. მასში მონაწილეობა მიიღეს აფხაზეთის რესპუბლიკის, საქართველოს, სამხრეთ ოსეთის რესპუბლიკის, რუსეთის ფედერაციისა და ამერიკის შეერთებული შტატების ოფიციალურმა წარმომადგენლებმა, გაერო-ს, ეუთო-სა და ევროკავშირის თანათავმჯდომარეობით. რუსული მხარე მოწოდებით გამოვიდა, დისკუსიების არსებული მანდატის შესაბამისად, რომ მიღებულ იქნას პრაქტიკული ზომები, რომლებიც უზრუნველყოფს აფხაზეთის რესპუბლიკისა და სამხრეთ ოსეთის რესპუბლიკის მტკიცე უსაფრთხოებას. საუბარია საქართველოსა და ორ სუვერენულ რესპუბლიკას შორის ძალის გამოუყენებლობის შესახებ იურიდიულად სავალდებულო შეთანხმების შემუშავების შესახებ. შეთანხმების მიღწევა მთელ რეგიონში სტაბილურობის განმტკიცებას ხელს მნიშვნელოვნად შეუწყობს“, – ნათქვამია განცხადებაში.
რუსული მხარის განცხადებით, აღნიშნული შეთანხმება რეგიონში სტაბილურობის განმტკიცებას შეუწყობდა ხელს. უწყებამ ასევე ხაზი გაუსვა საქართველოსა და ნატოს შორის თანამშრომლობის გაღრმავებას, მათ შორის ქვეყნის ტერიტორიაზე სამხედრო წვრთნების ჩატარებას, რასაც წინადადების აქტუალობის ზრდის მიზეზად ასახელებს.
„რუსეთის, აფხაზეთისა და სამხრეთ ოსეთის მიერ შეთავაზებული ნაბიჯების აქტუალობა იზრდება ნატო-სა და საქართველოს შორის თანამშრომლობის გაფართოების ფონზე, მათ შორის, ამ აგრესიული ალიანსის მიერ სამხრეთ კავკასიის ქვეყნის ტერიტორიაზე სამხედრო წვრთნების ჩატარებით“, – აღნიშნულია განცხადებაში.
მოსკოვმა ასევე გააკრიტიკა გაერო-ს გენერალური ასამბლეის მიერ იძულებით გადაადგილებულ პირთა შესახებ მიღებული რეზოლუცია, რომელსაც საქართველო ყოველწლიურად წარადგენს. რუსეთის საგარეო უწყების პოზიციით, ეს საკითხი ჟენევის ფორმატის ფარგლებში უნდა განიხილებოდეს, არა სხვა პლატფორმებზე, სადაც სოხუმისა და ცხინვალის წარმომადგენლებს მონაწილეობის შესაძლებლობა არა აქვთ.
