ამერიკის შეერთებულმა შტატებმა პოლონეთს გააფრთხილა, რომ რუსეთი შესაძლოა პოლონეთის ტერიტორიაზე შეიარაღებული პროვოკაცია მოაწყოს — მიზანი, ამერიკელი წარმომადგენლების შეფასებით, NATO-ს რეაგირების უნარის შემოწმებაა.
ამის შესახებ იტყობინება The Telegraph, პოლონეთის პრეზიდენტ კაროლ ნავროცკისთან დაახლოებულ წყაროებზე და პოლონურ გამოცემა Onet-ზე დაყრდნობით.
წყაროების ინფორმაციით, ვაშინგტონმა ვარშავა ამ გეგმის შესახებ არაერთხელ გააფრთხილა. სავარაუდო თავდასხმის ობიექტი შესაძლოა ქვეყნის ინფრასტრუქტურა გახდეს — იერიშები დრონებით ან რაკეტებით შესაძლოა განხორციელდეს.
Onet-ის უსაფრთხოების სფეროს წყაროების თანახმად, პროვოკაცია რამდენიმე ფორმით შეიძლება განხორციელდეს:
დრონებით იერიში კრიტიკულ ინფრასტრუქტურაზე, მათ შორის ელექტროსადგურებზე;
საჰაერო თავდასხმის იმიტაცია, რომელიც პოლონეთს საჰაერო თავდაცვის სისტემების გააქტიურებას აიძულებდა; უკიდურეს შემთხვევაში — რუსი ან ბელარუსი სამხედროების მონაწილეობით მცირე სახმელეთო შეჭრა სასაზღვრო რეგიონში.
წყაროების თანახმად, ასეთი ინციდენტის შემთხვევაში მოსკოვს შესაძლოა საზღვრის კვეთა GPS-ის გაუმართაობით ან დაზიანებული ვერტმფრენის სამაშველო ოპერაციად წარმოეჩინა.
ინფორმაციას ადასტურებს რამდენიმე დამოუკიდებელი წყარო: პრეზიდენტ ნავროცკისთან დაახლოებული პირი, ერთ-ერთი NATO-ს წევრი ქვეყნის ელჩი, პოლონეთის თავდაცვის სამინისტროს წარმომადგენელი და ბალტიისპირეთის უსაფრთხოების სფეროს წყარო, რომელმაც The Telegraph-ს დაუდასტურა, რომ ანალოგიური გეგმები მოსკოვში განიხილება.
ამასთან, რუსეთმა შესაძლოა სცადოს, მომხდარ პროვოკაციაში მოგვიანებით უკრაინა დაადანაშაულოს.
პრეზიდენტთან დაახლოებული წყაროს განცხადებით, აშშ რეგულარულად აწვდის პოლონეთს განახლებულ ინფორმაციას რუსეთის მხრიდან NATO-ს აღმოსავლეთ ფლანგზე შესაძლო ტრადიციული თავდასხმის გეგმების შესახებ.
წყაროების შეფასებით, პროვოკაციის მიზანი დაძაბულობის ესკალაცია და დასავლელი მოკავშირეების უკრაინისთვის სამხედრო დახმარების შეჩერებისკენ ბიძგებაა. The Telegraph-ის ინფორმაციით, ეს გეგმა უახლოეს თვეებში შეიძლება განხორციელდეს, თუმცა მოსკოვს საბოლოო გადაწყვეტილება ჯერ არ მიუღია.
შესაძლო სახმელეთო შეჭრის შემთხვევაში, წყაროების თანახმად, ეს მოხდება ან კალინინგრადის ოლქიდან — რუსეთის ექსკლავი პოლონეთის ჩრდილოეთით, სადაც ბირთვული იარაღია განთავსებული — ან ბელარუსის ტერიტორიიდან
