„ოცნების პრემიერი“,„ოცნების ხელისუფლება“ – ამ და სხვა ტერმინების გამო კომუნიკაციების კომისიამ „ფორმულა“ 5 000 ლარით დააჯარიმა. ეს ComCom-ის მიერ ტელევიზიის წინააღმდეგ ტერმინოლოგიასთან დაკავშირებული მესამე დავაა. კომისიის თქმით, „ფორმულამ” „მაუწყებლობის შესახებ“ საქართველოს კანონის 54-ე მუხლის – „სამართლიანობა და მიუკერძოებლობა” მე-5 პუნქტი დაარღვია.
კომისიამ სადაოდ გახადა ფრაზები, როგორებიცაა: „ოცნების ხელისუფლება“, „ქართული ოცნების პრეზიდენტი“, „ოცნების პროკურატურა“, „ოცნების პრემიერი“, „ოცნების საგარეო საქმეთა სამინისტრო“, „რეპრესიული კანონონები“, „ოცნების რეჟიმის რეპრესიები”.
“კომისიის მიერ გამოვლენილი დარღვევები მოიცავდა ახალი ამბების პროგრამებში ჟურნალისტებისა და წამყვანების მიერ გაკეთებულ შეფასებებს, რომლებიც მიმდინარე პოლიტიკური და საზოგადოებრივი საკითხების მაუწყებლის პირადი დამოკიდებულების საფუძველზე გაშუქებას წარმოადგენდა, რასაც კანონმდებლობა ზღუდავს. კერძოდ: “მაუწყებლობის შესახებ” საქართველოს კანონით აკრძალულია ახალი ამბებისა და საზოგადოებრივ-პოლიტიკური პროგრამების პირადი დამოკიდებულების ან მოსაზრების საფუძველზე გაშუქება. იკრძალება მაუწყებლის მიერ ახალი ამბებისა და საზოგადოებრივ-პოლიტიკურ პროგრამაში პოლიტიკური ან სხვა სახის დაპირისპირების ამსახველი ინფორმაციის ან საჯარო პოლიტიკის მიმდინარე საკითხების გაშუქება მაუწყებლის პირადი დამოკიდებულების ან მოსაზრების საფუძველზე. შესაბამისად, შეზღუდულია არა მხოლოდ მაუწყებლის პოზიციის გამოხატვა, არამედ – მაუწყებლის პოზიციის შესაბამისად, პოლიტიკური ან სხვა სახის დაპირისპირების და საჯარო პოლიტიკის მიმდინარე საკითხების გაშუქება.
გამომდინარე იქიდან, რომ ტელეკომპანია ფორმულას ბოლო ერთი წლის განმავლობაში მსგავსი ხასიათის დარღვევისთვის უკვე მიღებული აქვს ორი სანქცია: წერილობითი გაფრთხილება და 2500 ლარიანი ჯარიმა, ამ ჯერზე “მაუწყებლობის შესახებ” საქართველოს კანონის თანახმად კომპანიას უნდა დაეკისროს ჯარიმა არაუმეტეს მისი წლიური შემოსავლის 1%-ისა, მაგრამ კომისიამ ამჯერად გამოიყენა დისკრეციული უფლებამოსილება და აღნიშნული სამართალდარღვევისთვის ტელეკომპანია ფორმულას კანონით გათვალისწინებული მინიმალური ოდენობის ჯარიმა – 5000 ლარი დააკისრა” – ნათქვამია განცხადებაში.
რაც შეეხება TV იმედს, ComCom-ის განცხადებით, საქმე ეხება ტელეკომპანიის მიერ სამაუწყებლო ეთერში, ინტერნეტში, ვებგვერდსა და სოციალურ ქსელში გავრცელებულ ინფორმაციას, რომლის შესახებაც კომისიას საჩივრით ა(ა)იპ საქართველოს მომავლის აკადემიამ მიმართა.
“კომისიამ დაადგინა, რომ ეთერსა და ინტერნეტში გავრცელებული ინფორმაციით ტელეკომპანია იმედის მიერ დარღვეულია “მაუწყებლობის შესახებ” საქართველოს კანონის მოთხოვნები. მათ შორის, ინფორმაციის წყაროს ანონიმურობაზე მითითების ვალდებულება, განსხვავებული მოსაზრებების დაბალანსებულად გაშუქების ვალდებულება, პროგრამაში მონაწილე პირთა მიმართ ჯეროვანი სამართლიანობისა და პატივისცემით მოპყრობის ვალდებულება და პროგრამაში გამოთქმულ ბრალდებებზე პასუხის გაცემის უფლების მიცემის ვალდებულება.
გამომდინარე იქიდან, რომ ბოლო ერთი წლის განმავლობაში ტელეიმედის მიმართ მსგავსი დარღვევის ჩადენისთვის ადმინისტრაციული პასუხისმგებლობის არც ერთი სახე გამოყენებული არ ყოფილა, კომუნიკაციების კომისიამ მაუწყებელი წერილობით გააფრთხილა” – წერს უწყება.
ამ და მსგავსი ტერმინების გამოყენებისთვის კომუნიკაციების კომისიამ „ფორმულა” 21 მაისს უკვე დააჯარიმა. ამ დროისთვის, ტელევიზიას 2 ჯარიმა და 1 წერილობითი გაფრთხილება აქვს.
კომუნიკაციების კომისიამ ამ ეტაპზე მხოლოდ ჯარიმას მიმართა და არ გამოიყენა ალტერნატიული სანქცია, რომელიც კანონმდებლობის შესაბამისად, ტელევიზიის ავტორიზაციის შეჩერების საკითხს ითვალისწინებს.
თუკი კომუნიკაციების კომისია ისევ დაადგენს დარღვევას, კომისია კვლავ უფლებამოსილი იქნება ტელევიზიის ავტორიზაციის შეჩერების საკითხზე იმსჯელოს ან დააკისროს გაზრდილი ოდენობის ჯარიმა არანაკლებ 10 000 ლარისა, არაუმეტეს კომპანიის წლიური შემოსავლის 3%-ისა