Axios-ის ცნობით, CIA-ის დირექტორმა, ჯონ რეტკლიფმა ამ კვირის დასაწყისში მოსკოვში საიდუმლო ვიზიტის დროს კვლავ წამოაყენა დონალდ ტრამპის, ვლადიმირ პუტინისა და ვოლოდიმირ ზელენსკის სამმხრივი სამიტის გამართვის წინადადება. ამის შესახებ Axios-ი ორ წყაროზე დაყრდნობით წერს.
Axios-ის ცნობით, ეს პირველი შემთხვევაა, როდესაც რეტკლიფი პირადად ჩაერთო უკრაინაში მშვიდობის მიღწევისკენ მიმართულ დიპლომატიურ ძალისხმევაში. გამოცემის წყაროების მიხედვით, ვიზიტისას რეტკლიფს უნდა გაერკვია, შეეძლო თუ არა რუსეთის სპეცსამსახურების ხელმძღვანელობას პუტინის დარწმუნება უკრაინასთან მოლაპარაკებების განახლებაში. წყაროების მტკიცებით, რეტკლიფი მივიდა დასკვნამდე, რომ რუსეთის ფედერალური უსაფრთხოების სამსახურის (FSB) ხელმძღვანელი ალექსანდრ ბორტნიკოვი არის „კონსტრუქციული მოთამაშე, რომელსაც შეუძლია დიპლომატიური ძალისხმევის განახლებაში დახმარება“.
Axios-ის ცნობით, პარასკევს ამერიკელმა ოფიციალურმა პირებმა ზელენსკის რეტკლიფის მოსკოვში გამართული მოლაპარაკებებისა და სამმხრივი სამიტის შეთავაზების შესახებ აცნობეს. გამოცემა აღნიშნავს, რომ ტრამპის ადმინისტრაციას მოლაპარაკებების ასეთი ფორმატი ადრეც ჰქონდა შეთავაზებული, თუმცა პუტინმა წინადადება უარყო.
CIA-ის ხელმძღვანელის მოსკოვში ვიზიტის მიზნები
რეტკლიფი რუსეთში 25 აგვისტოს აშშ-ის სამხედრო-სატრანსპორტო თვითმფრინავით Boeing C-17 Globemaster III ჩავიდა და ქვეყანა რამდენიმე საათში დატოვა. The Wall Street Journal-ის ცნობით, ვიზიტი იმდენად გასაიდუმლოებული იყო, რომ მის შესახებ თეთრი სახლის ზოგიერთმა მაღალჩინოსანმაც კი არ იცოდა.
Politico სამი წყაროს ცნობაზე დაყრდნობით წერდა, რომ რეტკლიფის მოსკოვში ვიზიტის მთავარი მიზანი რუსეთისთვის გზავნილის გადაცემა იყო — აშშ-ის ნატოელ მოკავშირეებზე თავდასხმა დაუშვებელია.
The New York Times-ის ინფორმაციით, მოსკოვში ვიზიტის დროს რეტკლიფმა FSB-ის ხელმძღვანელ ალექსანდრ ბორტნიკოვს რუსეთის მდგომარეობის შესახებ უკრაინის ომში „თავისი პირქუში შეფასება“ გაუზიარა და მოსკოვს მოუწოდა, მოლაპარაკებები მანამდე დაიწყოს, სანამ სამხედრო და ეკონომიკური ვითარება კიდევ უფრო გაუარესდება.