ოთარ ფარცხალაძე–რომანოვი უკრაინის წინააღმდეგ რუსეთის ომში მიდის ბატალიონ “გეორგიევსკ“–თან ერთად

რუსეთში შეიქმნა საერთაშორისო მოხალისეთა დანაყოფი „გეორგიევსკი“, რომელიც უკრაინაში მიმდინარე საბრძოლო მოქმედებებში მონაწილეობას მიიღებს. ამის შესახებ რუსულ სახელმწიფო საინფორმაციო სააგენტო ТАСС-ს დანაყოფის მეთაურმა, საქართველოს ყოფილმა გენერალურმა პროკურორმა და რუსეთის მხარეს მებრძოლმა ოთარ რომანოვ-ფარცხალაძემ განუცხადა.

„1945 წელს სწორედ რუსმა მიხაილ ეგოროვმა და ქართველმა მელიტონ ქანთარიამ აღმართეს გამარჯვების დროშა რაიხსტაგზე. ჩემი თანამემამულეებიდან ყოველი მეოთხე თავისუფლებისთვის იბრძოდა. დარწმუნებული ვარ, რომ როგორც მაშინ, მტრის დამარცხების სიმბოლოს კვლავ რუსი და ქართველი აღმართავენ. ჩვენმა თანამოაზრეებმა და მხარდამჭერებმა, რომლებიც ჩვენი ხალხებისა და ქვეყნების გაერთიანებას, ასევე ტრადიციული ოჯახური ღირებულებების დაცვას უჭერენ მხარს, შექმნეს საერთაშორისო დანაყოფი „გეორგიევსკი“, — განაცხადა მან.

რომანოვ-ფარცხალაძის თქმით, დანაყოფის სახელწოდება უკავშირდება 1783 წლის გეორგიევსკის ტრაქტატს, რომელმაც, მისი შეფასებით, „უზარმაზარი როლი ითამაშა ქართველი ხალხის ისტორიაში“.

მისივე განცხადებით, დანაყოფის მთავარი ამოცანაა „ბოლომდე მიიყვანოს ბრძოლა იმ ბოროტების წინააღმდეგ, რომელიც არა მხოლოდ ჩვენ, არამედ მთელ მსოფლიოს ემუქრება“.

რომანოვ-ფარცხალაძემ აღნიშნა, რომ თავად მიიღო გადაწყვეტილება, რუსეთის მხარეს მოხალისედ ჩართულიყო ე.წ. „სპეციალურ სამხედრო ოპერაციაში“. მან ასევე განაცხადა, რომ საბრძოლო მოქმედებების დაწყებიდანვე საკუთარ გუნდთან ერთად აქტიურად ეხმარება რუს სამხედროებსა და დონეცკის ოკუპირებული რეგიონის, ასევე კურსკის, ბრიანსკისა და ბელგოროდის ოლქების მშვიდობიან მოსახლეობას.

„დღეს, როდესაც რუსეთი დასავლეთის ზეწოლის წინააღმდეგ იბრძვის საკუთარი იდენტობის, ტრადიციების, ენისა და კულტურის შესანარჩუნებლად, მზად ვარ, სამშობლოს დავეხმარო ლიდერის მიერ დასახული ყველა მიზნის მიღწევაში“, – ამბობს ფარცხალაძე.