აშშ-ისა და რუსეთის პრეზიდენტებმა, დონალდ ტრამპმა და ვლადიმირ პუტინმა, ტელეფონით განიხილეს სტივ უიტკოფისა და ჯარედ კუშნერის ვიზიტები მოსკოვსა და კიევში, განაცხადეს კრემლში. მათი თქმით, საუბარი „კონსტრუქციული და გულწრფელი“ იყო. ვაშინგტონში საუბარზე კომენტარი არ გაუკეთებიათ.
კრემლმა გაავრცელა ინფორმაცია რუსეთისა და აშშ-ის პრეზიდენტების, ვლადიმირ პუტინისა და დონალდ ტრამპის, სატელეფონო საუბრის შესახებ, რომელიც ამერიკელი მომლაპარაკებლების მოსკოვსა და კიევში ვიზიტების შემდეგ გაიმართა. საუბარი ზუსტად ერთ საათს გაგრძელდა და „კონსტრუქციული და გულწრფელი“ იყო, განაცხადა სამშაბათს, 8 სექტემბერს, რუსეთის პრეზიდენტის თანაშემწემ იური უშაკოვმა. მასალის გამოქვეყნების დროისთვის ვაშინგტონში სატელეფონო საუბარზე კომენტარი არ გაუკეთებიათ.
უშაკოვის თქმით, საუბრის დროს პუტინმა დადებითად შეაფასა ვაშინგტონის შუამავლური ძალისხმევა და განაცხადა, რომ რუსეთს „ევროპის მიმართ არავითარი აგრესიული გეგმები აზრადაც კი არ აქვს“.
ტრამპს სურს, ომის დასრულებაში გარღვევა მისი პრეზიდენტობის დროს მოხდეს
„საუბარი უკრაინის დარეგულირების საკითხებზე იყო ფოკუსირებული და ეს გასაგებიცაა. დონალდ ტრამპი მკაფიოდ უსვამდა ხაზს კონფლიქტის რაც შეიძლება სწრაფად დასრულების სურვილს, რაც დაუყოვნებლივ გახსნიდა შთამბეჭდავ და ფართომასშტაბიან პერსპექტივებს აშშ-სა და რუსეთს შორის ურთიერთობების სრულად აღსადგენად“, — განაცხადა უშაკოვმა.
მისი თქმით, ტრამპის სპეციალური წარმომადგენლების, სტივ უიტკოფისა და ჯარედ კუშნერის რუსეთში ვიზიტის შედეგები კრემლში „დადებითად შეაფასეს“. ამასთან, მისი თქმით, ამ მიმართულებით მუშაობა გაგრძელდება.
უშაკოვის განცხადებით, ამერიკის პრეზიდენტი დაინტერესებულია, რომ რუსეთის მიერ უკრაინის წინააღმდეგ დაწყებული ომის დასრულების საქმეში გარღვევა სწორედ მისი პრეზიდენტობის პერიოდში მოხდეს. კრემლში განაცხადეს, რომ ტრამპი რუსეთის შეჭრის დასრულებას აშშ-სა და რუსეთს შორის ურთიერთობების აღდგენის პირობად მიიჩნევს, რასაც ორივე ქვეყნისთვის „კოლოსალური სარგებლის“ მოტანა შეუძლია.
ტრამპის წარმომადგენლების ვიზიტები მოსკოვსა და კიევში
უიტკოფი და კუშნერი 5 სექტემბერს მოსკოვში ვლადიმირ პუტინს შეხვდნენ, რის შემდეგაც თეთრ სახლში მოლაპარაკებებს „შინაარსიანი“ უწოდეს. კრემლმა კი უკრაინაში ომის დარეგულირების კუთხით არსებული ვითარება რთულად შეაფასა. მანამდე ვაშინგტონის ეს წარმომადგენლები რუსეთის დედაქალაქში უკვე რამდენჯერმე იყვნენ ჩასული.
6 სექტემბრის დილით ამერიკელი მომლაპარაკებლები პოლონეთიდან მატარებლით კიევში ჩავიდნენ. ორივე მათგანისთვის ეს უკრაინაში პირველი ვიზიტი იყო მას შემდეგ, რაც ომის მშვიდობიანი დარეგულირების საკითხზე დაიწყეს მუშაობა.
მოლაპარაკებების პირველი რაუნდის შემდეგ ჟურნალისტებთან საუბრისას ჯარედ კუშნერმა განაცხადა, რომ აშშ-ის პრეზიდენტ დონალდ ტრამპს ესმის, რომ უკრაინაში მშვიდობის მიღწევა „ძალიან რთული და კომპლექსური პრობლემაა“, თუმცა ის „ძალიან მტკიცედ არის განწყობილი, დაასრულოს ეს ომი, შეაჩეროს ადამიანების დაღუპვა და შვება მოუტანოს ოჯახებს“.
მოგვიანებით Financial Times-მა დაწერა, რომ მომლაპარაკებლების ვიზიტებს მოსკოვსა და კიევში არანაირი შედეგი არ მოჰყოლია.