ევროკომისიის პრეზიდენტი ურსულა ფონ დერ ლაიენი მიესალმა ევროკავშირის წევრი სახელმწიფოების შეთანხმებას უკრაინისთვის “პატრიოტის” საჰაერო თავდაცვის სისტემებისთვის საჭირო კრიტიკული პროდუქციის შესყიდვის შესახებ.
ნატოს გენერალურ მდივან მარკ რუტესთან ერთად გავრცელებულ განცხადებაში ფონ დერ ლაიენმა აღნიშნა, რომ შემდეგი, 3.2 მილიარდი ევროს ტრანში უკრაინას თავისი საჰაერო სივრცის რუსეთის თავდასხმებისგან უკეთ დაცვაში დაეხმარება. ეს თანხა ემატება უკვე გამოყოფილ 8.4 მილიარდ ევროს, რომელიც უკრაინის მხარდაჭერის სესხის ფარგლებში, მათ შორის საჰაერო თავდაცვისთვის, უკვე გაიცა. ევროკომისიის ხელმძღვანელმა ხაზი გაუსვა, რომ ევროპა უკრაინის მხარდასაჭერად და საკუთარი თავდაცვისუნარიანობის გასაძლიერებლად აქტიურ თანამშრომლობას გააგრძელებს.
უკრაინის მხარდაჭერის სესხი ზღუდავს არაევროპული წარმოშობის შეიარაღების შესყიდვას პროდუქტის ღირებულების 35%-მდე, თუ ევროპული ალტერნატივა ხელმისაწვდომი არ არის. ვინაიდან “პატრიოტის” სისტემები აშშ წარმოებისაა, საჭირო გახდა ევროკავშირის წევრი სახელმწიფოების მიერ ამ წესიდან გამონაკლისის დამტკიცება. 
რის შესყიდვას ითვალისწინებს შეთანხმება.
საუბარია განსაკუთრებით მოწინავე PAC-3 ტიპის “პატრიოტის” საჰაერო თავდაცვის სისტემებზე, რომელთა მოთხოვნაც კიევმა წარმოადგინა რუსეთის მხრიდან საჰაერო თავდასხმების ინტენსივობის ზრდის ფონზე. 
გარიგების საბოლოო ტექნიკური დეტალების დასრულება 11 სექტემბრისთვის, პარასკევს, არის მოსალოდნელი. 
უკრაინის თავდაცვის მინისტრმა ევჰენი ხმარამ ევროკავშირს ამ მხარდაჭერისა და განაცხადის სწრაფი განხილვისთვის მადლობა გადაუხადა. 
ეს ტრანში ნაწილია 2026-2027 წლებისთვის დაგეგმილი 90 მილიარდ ევროიანი სესხის პროგრამისა, საიდანაც 2026 წელს თავდაცვასთან დაკავშირებულ ხარჯებზე 28 მილიარდ ევროზე მეტია გამოყოფილი.