თავდაცვის ყოფილ მინისტრ ჯუანშერ ბურჭულაძესა და მის ნათესავ ვასილ მხეიძეს განსაკუთრებით დიდი ოდენობით ქრთამის აღებისა და ქრთამის აღებაში დახმარების საქმეზე საპროცესო შეთანხმება გაუფორმდათ. შეთანხმება მოსამართლე ფიქრია სიქტურაშვილმა დაამტკიცა.
სასამართლო სხდომას ორივე ბრალდებული ესწრებოდა. ბურჭულაძესა და მხეიძეს სიტყვით არ უსარგებლიათ და მოსამართლის დამაზუსტებელ კითხვებს მხოლოდ „დიახ“-ით უპასუხეს.
სასამართლოს გადაწყვეტილებით, ჯუანშერ ბურჭულაძე დამნაშავედ იქნა ცნობილი საქართველოს სისხლის სამართლის კოდექსის 338-ე მუხლით, რაც ქრთამის აღებას ეხება. მას 5 წლით თავისუფლების აღკვეთა განესაზღვრა, საიდანაც 3 წელს სასჯელაღსრულების დაწესებულებაში მოიხდის, 2 წელი კი პირობითად ჩაეთვალა. ამასთან, ბურჭულაძეს 1 მილიონი ლარის ჯარიმის გადახდა დაეკისრა.
ვასილ მხეიძეს 4 წლითა და 2 თვით თავისუფლების აღკვეთა მიესაჯა. აქედან 1 წელსა და 2 თვეს ის სასჯელაღსრულების დაწესებულებაში მოიხდის, 3 წელი კი პირობითად ჩაეთვალა. მას 100 ათასი ლარის ოდენობით ჯარიმის გადახდაც დაეკისრა.
პროკურატურის ინფორმაციით, ბურჭულაძესა და მხეიძეს ახალი ბრალდება სასამართლოში დღეს წარედგინათ. უწყების განცხადებით, მათთან საპროცესო შეთანხმების გაფორმებისას გათვალისწინებული იყო „გამოძიებასთან მათი თანამშრომლობის ხარისხი“.
საქმე თავდაცვის სამინისტროს მიერ ძვირადღირებული სამედიცინო აპარატურისა და ინვენტარის საიდუმლო შესყიდვებს ეხება.
ბრალდების მხარის ვერსიით, 2022 წლის ბოლოდან თავდაცვის სამინისტროს სხვადასხვა სამედიცინო აპარატურისა და ინვენტარის შეძენა დასჭირდა. ბურჭულაძესთან შეთანხმებით, მისმა ნათესავმა, ვასილ მხეიძემ, შესაბამისი გამოცდილების მქონე ბიზნესმენს შესყიდვების ისეთი ფორმით განხორციელება შესთავაზა, რომელიც მისი კომპანიის გამარჯვებას უზრუნველყოფდა.
პროკურატურის თანახმად, სანაცვლოდ მხეიძე ბიზნესმენისგან მთლიანი სახელშეკრულებო ღირებულების 10%-ს ნაღდი ფულის სახით ითხოვდა.
ბრალდების მიხედვით, ბიზნესმენმა გარანტიები მაღალი თანამდებობის პირებისგანაც მოითხოვა. ამ ეტაპზე, პროკურატურის განცხადებით, ჯუანშერ ბურჭულაძე იმჟამინდელ პრემიერ-მინისტრ ირაკლი ღარიბაშვილს შეუთანხმდა, რომ თავდაცვის სამინისტროს შესყიდვები იმგვარად განხორციელდებოდა, რაც კონკრეტულ კომპანიებს სასურველი ფასით გამარჯვების გარანტიას მისცემდა, სანაცვლოდ კი თანამდებობის პირები ფინანსურ სარგებელს მიიღებდნენ.
გამოძიების ვერსიით, ღარიბაშვილისგან სამსახურებრივი მფარველობის მიღების შემდეგ, სამი საიდუმლო შესყიდვის ფარგლებში თავდაცვის სამინისტროს 11 მილიონ 499 ათას 705 ლარის რეალური ღირებულების მქონე სამედიცინო აპარატურა და სხვა ინვენტარი 18 მილიონ 484 ათას 960 ლარად მიაწოდეს.
პროკურატურის ინფორმაციით, ბურჭულაძემ ქრთამის სახით მიღებული 1.5 მილიონი ლარიდან 750 ათასი ლარი თავად დაიტოვა, დანარჩენი 750 ათასი ლარი კი რამდენიმე ეტაპად ირაკლი ღარიბაშვილს გადასცა.
ბურჭულაძისა და მხეიძისთვის ეს პირველი განაჩენი არ არის. იმავე საქმეზე ჯუანშერ ბურჭულაძე უკვე მსჯავრდებულია სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციისთვის და მას 10 წლით თავისუფლების აღკვეთა აქვს მისჯილი.
ვასილ მხეიძე კი დიდი ოდენობით თანხის გაფლანგვაში დახმარებისთვისაა მსჯავრდებული და 8 წლით თავისუფლების აღკვეთას იხდის.