უკრაინის პრეზიდენტმა ვოლოდიმირ ზელენსკიმ გამოცემა Axios-ს ინტერვიუ მისცა და დონალდ ტრამპის სპეციალურ წარმომადგენლებთან გუშინდელი მოლაპარაკებების შესახებ რამდენიმე დეტალი გაამხილა.
ზელენსკის თქმით, სტივ უიტკოფისა და ჯარედ კუშნერის მოსკოვსა და კიევში ვიზიტების მთავარი მიზანი იყო დიპლომატიური პროცესის „განბლოკვა“ და მომავალი ზამთრის განმავლობაში ომის ესკალაციის თავიდან აცილების მცდელობა.
„არსებობს იდეები ენერგეტიკულ ობიექტებთან, მარცვლეულის მიწოდებასთან, ელექტროენერგეტიკულ ინფრასტრუქტურასთან და ნავთობისა და გაზის ექსპორტთან დაკავშირებით. ჩვენ და რუსეთს განსხვავებული ინტერესები გვაქვს“, — ციტირებს ზელენსკის Axios-ის ჟურნალისტი ბარაკ რავიდი.
რავიდის ინფორმაციით, კითხვაზე, გულისხმობს თუ არა ამერიკული მიდგომა მოლაპარაკებების ხელახლა დაწყების მცდელობას და ზამთარში სერიოზული ესკალაციის თავიდან აცილებას, ზელენსკიმ უპასუხა, რომ ასეთი შეფასება „ძალიან ახლოსაა ამ საუბრების რეალურ შინაარსთან“.
ამასთან, ამერიკელი ოფიციალური პირები, რომელთა ვინაობასაც ჟურნალისტი არ ასახელებს, დარწმუნებული არ არიან, რომ უკრაინა და რუსეთი ზამთრის დადგომამდე რაიმე სახის კომპრომისს მიაღწევენ. გამოცემა აღნიშნავს, რომ მანამდე არაერთხელ სცადეს ცეცხლის შეწყვეტაზე შეთანხმება ან ენერგეტიკულ ობიექტებზე თავდასხმების შეჩერება, თუმცა ყველა ასეთი მცდელობა წარუმატებლად დასრულდა.
ზელენსკის თქმით, ახლა ამერიკელი მომლაპარაკებლები ვიზიტის შედეგების შესახებ პრეზიდენტ ტრამპს მოახსენებენ, შემდეგ კი უკრაინასა და ევროპასთან კონსულტაციებს გააგრძელებენ.
უკრაინის პრეზიდენტმა ასევე აღნიშნა, რომ, მისი აზრით, რუსეთს „ნამდვილად სჯერა, რომ ეს ზამთარი მათ ჩვენი გატეხვის საშუალებას მისცემს“ — ფრონტზე შეტევის გაგრძელებისა და ინფრასტრუქტურაზე დარტყმების გზით.
ზელენსკის შეფასებით, მოსკოვში ვარაუდობენ, რომ ამის შემდეგ კიევი კომპრომისებზე წასვლისადმი უფრო მეტად იქნება განწყობილი.
ზელენსკიმ დაამატა, რომ კიევს სურს დიპლომატიური პროცესის გაგრძელება სექტემბერ-ოქტომბერში და შესთავაზა მორიგი ამერიკულ-უკრაინული მოლაპარაკებების გამართვა გაეროს გენერალური ასამბლეის ფარგლებში, რომელიც უახლოეს მომავალში ნიუ-იორკში გაიმართება.