დამნაშავე ავადმყოფები არიან შემსრულებლებიც, დამკვეთებიც, დამნერგავებიც, დავალების გამცემებიც, “გამპრავებლებიც” და მთლიანად სისტემა ბიძინა ივანიშვილის თაოსნობით, – ასე ეხმაურება პატიმრობაში მყოფი “დროას“ ლიდერი, ელენე ხოშტარია მსჯავრდებულ გიორგი დავითაძის მიერ გავრცელებულ ინფორმაციას.
ხოშტარია ფეისბუქზე გამოქვეყნებულ წერილში წერს, რომ მოქმედებაა საჭირო, მთავარი სისუსტე კი გულგრილობაშია.
„სისტემა კლავს, სისტემა რყვნის, სისტემა უნდა დაემხოს! ჩემი დაგროვილი გამოცდილების გათვალისწინებით, იზოლატორშიც და ციხეშიც, აბსოლუტურად დარწმუნებული ვარ, რომ დავითაძის მიმართ ნამდვილად განხორციელდა ეს კოშმარი. გარდა ამისა, ამაზე მოწმობს, რომ: 1. სპეციალურად ეფარებიან კამერას. 2. წინასწარ მოემზადნენ ხელთათმანით და ექიმით. 3. ფორმალურად იქნევენ დეტექტორს. 5. პირველად არ აკეთებენ!
დამნაშავე ავადმყოფები არიან შემსრულებლებიც, დამკვეთებიც, დამნერგავებიც, დავალების გამცემებიც, “გამპრავებლებიც” და მთლიანად სისტემა ბიძინა ივანიშვილის თაოსნობით. პასუხისმგებლობა როგორც მათ, ისე საკუთარ თავსაც უნდა დავაკისროთ. არ უნდა შევეგუოთ, უნდა ვიმოქმედოთ. დღეს ჩვენი ძალა ერთად ბრძოლაშია, ხოლო ჩვენი მთავარი სისუსტე გულგრილობაში.
ჩემი ოჯახი და ჩემი გუნდი პატიმარ დავითაძისა და მისი ოჯახის გვერდით იქნება ბოლომდე!“, – წერს ელენე ხოშტარია წერილში, რუსთავის ქალთა ციხიდან.
მსჯავრდებულმა გიორგი დავითაძემ თბილისის სააპელაციო სასამართლოში გააკეთა განცხადება, რომ ის N6 პენიტენციური დაწესებულების ბადრაგმა დეესკალაციის ოთახში გააუპატიურა. მისი თქმით, ძალადობაში რამდენიმე პირი მონაწილეობდა და მისი მტკიცებით, „ყველაფერი კამერებში ჩანს“.
პეციალური პენიტენციური სამსახური ბრალდებას უარყოფს და დეზინფორმაციას უწოდებს. პენიტენციური სამსახურის მტკიცებით, დავითაძის მიმართ „არათუ სექსუალური, არამედ არანაირი სახის ძალადობას არ ჰქონია ადგილი“.