გერმანიის ახლად დანიშნულმა ელჩმა საქართველოში, ბარბარა ფოსმა, თბილისში, გერმანიის ერთიანობის დღისადმი მიძღვნილ ღონისძიებაზე სიტყვით გამოსვლისას, ქვეყანაში გერმანული პოლიტიკური ფონდების მუშაობის შეჩერებასა და ორმხრივ ურთიერთობებზე ისაუბრა. როგორც გამოცემა „OC Media“ წერს, ელჩმა ღიად გამოხატა შეშფოთება შექმნილი ვითარების გამო:
„ჩვენი ოთხივე პოლიტიკური ფონდი, რომლებიც ათწლეულების განმავლობაში უჭერდნენ მხარს საქართველოსა და მის ხალხს ევროპული ინტეგრაციის გზაზე, იძულებული გახდა, დროებით შეეჩერებინა საქმიანობა საქართველოს მთავრობის გადაწყვეტილების გამო… ეს მოვლენები ასევე აისახება საქართველოსა და ევროკავშირს შორის ურთიერთობებზე“.
ელჩის ამ განცხადებას წინ უძღოდა ორი მსხვილი გერმანული ორგანიზაციის — კონრად ადენაუერის ფონდისა (KAS) და ფრიდრიხ ნაუმანის ფონდის (FNF) მიერ თბილისის ოფისების ოფიციალური დახურვა. ფონდებმა საქმიანობა მას შემდეგ შეწყვიტეს, რაც საქართველოს მთავრობამ, ახალი „გრანტების შესახებ“ კანონის საფუძველზე, მათი საგრანტო განაცხადები პროექტების დაფინანსების გაგრძელებაზე სრულად უარყო. KAS-მა მიღებულ გადაწყვეტილებას „იძულებითი“ უწოდა, ხოლო FNF-მა — „გარდაუვალი“, რადგან ახალმა მოთხოვნებმა მათ დამოუკიდებლად მუშაობის შესაძლებლობა წაართვა.
ორივე ორგანიზაცია საქართველოში ორ ათწლეულზე მეტია ოპერირებს და ხელს უწყობს დემოკრატიის, კანონის უზენაესობის, თავისუფალი საზოგადოებისა და ევროინტეგრაციის პროცესებს.
ფრიდრიხ ებერტის ფონდსა (FES) და ჰაინრიხ ბიოლის ფონდს (HBS) ოფისების დახურვის შესახებ განცხადებები არ გაუვრცელებიათ, თუმცა გერმანიის ელჩის განცხადების თანახმად, ახალი საგრანტო რეგულაციების გამო, როგორც ჩანს, ისინიც ანალოგიური პრობლემების წინაშე დადგნენ, როგორც ბოლო დღეებში დახურული 2 გერმანული ფონდი.
ფონდების დახურვას გამოეხმაურა შალვა პაპუაშვილი, რომელმაც აღნიშნა, რომ უცხოურ ფონდებს საქართველოში პოლიტიკური მისია აქვთ და რაკი ამ მისიის შესრულება აეკრძალათ, ამიტომაც გადიან ქვეყნიდან.