უკრაინამ იერიში მიიტანა ახტუბინსკის სამხედრო აეროდრომზე, სადაც ახალი და მოდერნიზებული საავიაციო ტექნიკის, მათ შორის Су-34 ტიპის გამანადგურებლების, გამოცდა მიმდინარეობს. რუსეთის ხელისუფლებამ რეგიონზე თავდასხმა დაადასტურა, თუმცა აეროდრომის მდგომარეობის შესახებ ინფორმაცია არ გაუვრცელებია.
უკრაინამ 15 ნოემბერს, კვირას, ღამით რუსეთის ასტრახანის ოლქში მდებარე ახტუბინსკის სამხედრო აეროდრომზე იერიში მიიტანა. ამის შესახებ უკრაინის შეიარაღებული ძალების გენერალურმა შტაბმა და უკრაინულმა მონიტორინგის Telegram-არხებმა განაცხადეს.
როგორც როსტოვული გამოცემა „იუჟნი ფედერალნი“ წერს, კვირას ღამით ახტუბინსკში უპილოტო საფრენი აპარატების თავდასხმის საფრთხის გამო განგაშის უმაღლესი, წითელი დონე გამოცხადდა. ადგილობრივი მოსახლეობის თქმით, ქალაქში ძლიერი აფეთქებების ხმა ისმოდა, ცაზე კი ნათებები ჩანდა.
ასტრახანის ოლქის გუბერნატორმა იგორ ბაბუშკინმა განაცხადა, რომ რეგიონის ჩრდილოეთ ნაწილში 30-ზე მეტი უპილოტო საფრენი აპარატი ჩამოაგდეს. ახტუბინსკის ხელისუფლებამ ასევე აღნიშნა, რომ უკრაინული დრონების თავდასხმის შედეგად ქალაქის ინფრასტრუქტურის დაზიანების ფაქტები არ გამოვლენილა. სამხედრო აეროდრომის მდგომარეობის შესახებ ოფიციალური ინფორმაცია არ გავრცელებულა.
უკრაინული მონიტორინგის არხ Exilenova+-ის მონაცემებით, ახტუბინსკის აეროდრომის მიმდებარე ტერიტორიაზე, სადაც ახალი სამხედრო საავიაციო ტექნიკის გამოცდა მიმდინარეობს და Су-34 ტიპის თვითმფრინავებია განთავსებული, დაახლოებით 30 აფეთქება მოხდა.
უკრაინის შეიარაღებული ძალების გენერალური შტაბის განცხადებით, ობიექტზე განხორციელებული დარტყმის შემდეგ, საწყობში, სადაც საავიაციო მართვადი რაკეტების კომპლექტები ინახებოდა, მეორეული დეტონაცია დაფიქსირდა.
უკრაინას ახტუბინსკის სამხედრო აეროდრომზე იერიში ადრეც მიუტანია
ახტუბინსკის აეროდრომზე განთავსებულია რუსეთის თავდაცვის სამინისტროს ვალერი ჩკალოვის სახელობის 929-ე სახელმწიფო საფრენოსნო-საგამოცდო ცენტრი.
ცენტრი ახორციელებს ახალი თვითმფრინავების, ვერტმფრენების, მათი შეიარაღებისა და მოდერნიზებული საავიაციო ტექნიკის გამოცდას. 2023 წელს ცენტრი ევროკავშირის სანქციების სიაში შეიყვანეს.
უკრაინას ამ აეროდრომზე იერიში უკვე რამდენჯერმე აქვს მიტანილი.
2026 წლის აგვისტოში უკრაინის შეიარაღებული ძალების გენერალურმა შტაბმა განაცხადა, რომ თავდასხმის შედეგად აეროდრომზე დაზიანდა Су-34 ტიპის გამანადგურებელ-ბომბდამშენი და მოხდა საწვავის გაჟონვა.
2024 წლის ივნისში უკრაინის სამხედრო დაზვერვამ ასევე გაავრცელა ინფორმაცია, რომ ახტუბინსკში უახლესი რუსული Су-57 ტიპის გამანადგურებელი დააზიანა.