ქართული ოცნების სიის მე-3 ნომერი ირაკლი კობახიძე გუშინ მარნეულში ჟურნალისტებზე თავდასხმას ეხმიანება.
მისი თქმით, “კრიმინალური ოპოზიცია” პროვოკაციებს აწყობს, რაზეც აქტივისტებს აფრთხილებდნენ. კობახიძე ამტკიცებს, რომ დღეს ქართული ოცნების მარნეულის შტაბის წევრს ოპოზიციის წარმომადგენლები თავს დაესხნენ და მიაყენეს მძიმე ფიზიკური დაზიანებები.
“თითოეულმა თავდამსხმელმა უნდა იცოდეს, რომ ისინი კანონის მთელი სიმკაცრით აგებენ პასუხოს”,- ამბობს კობახიძე ბრიფინგზე.
მისი თქმით, ნიკანორ მელია და აჰმედ იმამკულიევი წლების განმავლობაში პროფესიონალ საარჩევნო პროვოკატორებად ჩამოყალიბდნენ.
“მათი შესრულებით გასული წლების განმავლობაში არაერთი უმძმესი საარჩევნო პროვოკაცია ვიხილეთ. მძიმე პროვოკაციებით გამოირჩევიან კახა ოქრიაშვილის აქტივისტებიც, რამაც კიდევ ერთხელ გაგვიმყარა რწმენა, რომ ქართული ოცნებიდან მისი ჩამოშორებით უალტერნატივოდ სწორი გადაწყვეტილება მივიღეთ”,- აცხადებს ირაკლი კობახიძე.
ცნობისთვის, გუშინ მარნეულში მთავარი არხის გადამღებ ჯგუფსა საზოგადოებრივი მაუწყებლის ოპერატორს ფიზიკური შეურაცხყოფა მიაყენეს და აპარატურა დაუმტვრიეს. მთავარის ჟურნალისტი ჯეიჰუნ მუჰამედალი საავადმყოფოში გადაიყვანეს. მისი მდგომარეობა დამაკმაყოფილებელია.
