იტალიის მოდის სახლი Dolce & Gabbana სკანდალში აღმოჩნდა გახვეული მისი სააღდგომო სუვენირების გამო. სოციალურ ქსელებში საკუთარ გვერდებზე მათ დაიწყეს სააღდგომო შოკოლადის კვერცხის რეკლამირება, რომლის შეფუთვა, ფორმითაც და ორნამენტებითაც ძალიან გავს რუსულ ტრადიციულ ქალის თავსაბურავს, ე.წ. “კოკოშნიკს“ და მატრიოშკას.
სწორედ ეს აღნიშნეს სოციალური ქსელების მომხმარებლებმა საკუთარ კომენტარებში და ახალ სუვენირს “რუსული მატრიოშკა კოკოშნიკში“ დაარქვეს.
თავად Dolce & Gabbana–მ ანოტაციაში დაწერა, რომ ეს არის “სააღდგომო კვერცხების ექსკლუზიური კოლექცია იტალიური საკონდიტრო ბრენდის, Baci Perugina–სგან, რომელიც საკულტო პრინტით – DGMaiolica–თი და ყვავილების მოტივებით არის გაფორმებული.“
“იტალიური სილამაზის არსის გადააზრება შეგრძნებების უნიკალურ ჰარმონიაში და სუფთა, ხალასი სინაზის გემო, ეს არის უსაზღვრო სიყვარულის განაცხადი“– ასეთია მოდის სახლის შეფასება.
თუმცა მის შეფასებას არ იზიარებენ განსაკუთრებით უკრაინის მოქალაქეები, რომლებმაც სოციალურ ქსელებში ბრენდს მისწერეს, რომ ასეთი პროდუქციის გამოშვება, რომელიც ევროპის ცენტრში ომის დროს სრულიად კონკრეტულ ასოციაციებს იწვევს, მათი მხრიდან უპატივცემულობის გამოხატულება და რეპუტაციისთვის დამაზიანებელია.
შეგახსენებთ, რომ ეს არ არის პირველი შემთხვევა, როცა Dolce & Gabbana საერთაშორისო სკანდალში ეხვევა მისი პროდუქციის გამო. 2018 წელს მათ გამოუშვეს სარეკლამო რგოლი შანხაის ჩვენებასთან დაკავშირებით, რომელმაც იმდენად განარისხა ჩინელები, რომ ამ ბრენდის პროდუქციის ბოიკოტირების მოწოდებითაც კი გამოვიდნენ.