{{ARTICLEIMAGE}}
#ერთადსახლში – საქართველოს ექსპრეზიდენტი მიხეილ სააკაშვილი ახალ მოძრაობას იწყებს.
სააკაშვილი საკუთარი “ფეისბუქის” გვერდზე ქართველი ემიგრანტებისთვის ვიდეომიმართვას ავრცელებს და აცხადებს, რომ მათი “დიდი ტალღა უნდა ააზვირთონ, რომლებმაც გაზაფხულამდე უნდა მიაღწიონ საქართველომდე და მიხეილ სააკაშვილი პირდება, რომ საქართველოში მათ გაყვება.
“ძალიან ბევრს ვხვდები უცხოეთში ჩვენს თანამემამულეებს, ზოგს ტაქსიში, ზოგს რაღაც მშენებლობაზე, ზოგს აკადემიურ დაწესებულებაში, ეს ხალხი თავისი შრომით ინახავს არა მხოლოდ თავის ნათესავებს საქართველოში, არამედ რეალურად, ინახავს იმ დამპალ რეჟიმსაც, რომელის არის საქართველოში თავისი გადარიცხვებით, რადგან საქართველოში სხვა ეკონომიკა უკვე გააჩანაგა ივანიშვილმა.
არადა, ეს ხალხი სწორედ გაჭირვებამ და უპერსპექტივობამ გამოყარა იქიდან. ამ არჩევნებზე ქართველმა ემიგრანტებმა აჩვენეს თავისი ძალა, უზარმაზარი უპირატესობით გაიმარჯვა ოპოზიციამ უცხოეთის უბნებზე, სადაც ხახვი და კარტოფილი ვერ დაარიგეს და სადაც მოსყიდვა არ მუშაობს.
ქართველებს, რომლებიც უცხოეთში არიან, რომლებმაც იციან შრომის ფასი, ვერ წვდება ივანიშვილის მოსყიდვა და მისი მეთოდები იქ არ ჭრის. მაგრამ ეს არ კმარა, ყველა ქართველს ენატრება საქართველოში დაბრუნება. ყველას უნდა, თავისი შვილები იქ გაზარდოს. ყველას უნდა, თავის შვილებს დაუბრუნდეს და არსად ქონდეს გასაქცევი”, ამბობს სააკაშვილი.
მისივე თქმით, ახალი მოძრაობის იდეა ქართველი პატრიოტების ჯგუფს ეკუთვნის.
“ახლა ქართველი პატრიოტების ჯგუფმა მომმართა, მათ შექმნეს მოძრაობა ერთად სახლში, ეს არის ძალიან მაგარი იდეა. ჩვენ უნდა დიდი ტალღა ავიზვირთოთ და ამ აზვირთებულმა ტალღებმა გაზაფხულამდე უნდა მიაღწიონ საქართველომდე, საქართველოს ყველა ქალაქამდე და ქართველებმა უნდა დაიბრუნონ საქართველო. მე თქვენთან ერთად წამოვალ, არაფრის არ მეშინია, ბოლომდე გავალთ, ჩვენ სამშობლოს გარდა არაფერი გვაქვს დასაკარგი და სამშობლო არ უნდა დავკარგოთ. ჩვენ აუცილებლად გავიმარჯვებთ – ერთად სახლში, ვაერთიანებთ ძალებს.
მე შემოვივლი უკლებლივ ყველა ცენტრს, სადაც არიან ქართველები, შეგხვდებით თითოეულ თქვენგანს, ჩაგხედავთ თვალებში, ჩავკიდოთ ერთმანეთს ხელები და წავიდეთ ჩვენი სამშობლოს დასაბრუნებლად, წავიდეთ ამ კოშმარის და ამ საოცრების დასასრულებლად, საქართველო იმსახურებს ბევრად მაგარ რაღაცას და ჩვენ ვიმსახურებთ, გვქონდეს მაგარი სამშობლო, აუცილებლად გვექნება მაგარი სამშობლო – ერთად სახლში, აბა თქვენ იცით”.
როგორც ცნობილია, ყოფილი პრეზიდენტი სააკაშვილი ევროპაში ცხოვრობს. მის წინააღმდე საქართველოში რამდენიმე საქმეზეა დაწყებული სისხლის სამართლებრივი დევნა. სააკაშვილი გაერთიანებულ ოპოზიციას უცხოეთიდან უჭერს მხარს და მათ მიერ ორგანიზებულ აქციებზეც “სკაიპის” საშუალებით ერთვებოდა. ყოფილ პრეზიდენტს სწორედ ასეთი ჩართვებისას და არამხოლოდ ინტერნეტით ჩართვისას არაერთელ დაუანონსებია, რომ საქართველოში ჩამოსვლას გეგმავს.