ვენესუელაში დამანგრეველი ორმაგი მიწისძვრის შედეგად დაღუპულთა რაოდენობა 1430-მდე გაიზარდა. ქვეყნის ხელისუფლების ცნობით, დაკარგულად ითვლება სულ მცირე 68 900 ადამიანი. ამის შესახებ Associated Press ვენესუელის მთავრობაზე დაყრდნობით წერს.
სპეციალისტების შეფასებით, გადარჩენილების პოვნისთვის გადამწყვეტად პირველ 48–72 საათს მიიჩნევენ, თუმცა ეს ვადა შეიძლება გაიზარდოს, თუ ნანგრევებში მოყოლილ ადამიანებს საკვებსა და წყალზე წვდომა აქვთ.
ყველაზე მეტად დაზარალებულ ლა-გუაირას შტატში უსაფრთხოების უზრუნველყოფისა და მაშველების დასახმარებლად 14 000-ზე მეტი სამხედრო და პოლიციელია გაგზავნილი. ქვეყნის პრეზიდენტის მოვალეობის შემსრულებლის, დელსი როდრიგესის განცხადებით, სხვა შტატებიდან ლა-გუაირაში მიმავალი ყველა გზა ჩაკეტილია.
AP-ის ცნობით, ადგილობრივ მოსახლეობაში უკმაყოფილება იზრდება. ისინი ხელისუფლების რეაგირებას არასაკმარისად მიიჩნევენ და ამბობენ, რომ მაშველები, არმია და პოლიცია ასეთი მასშტაბის კატასტროფისთვის მზად არ აღმოჩნდნენ. ლა-გუაირაში ზოგიერთ ადგილობრივს ნანგრევების გაწმენდა შიშველი ხელებითა და ნიჩბებით უწევდა, რათა ახლობლების გადარჩენა ეცადა.
ვენესუელაში საერთაშორისო დახმარებაც იზრდება. მთავრობის მონაცემებით, ქვეყანაში უკვე ჩავიდა სულ მცირე 17 რეისი სხვადასხვა ქვეყნიდან მაშველებით, სპეციალური ტექნიკითა და სამძებრო ძაღლებით. 27 ივნისის ღამით კარაკასის აეროპორტში დაეშვა გერმანიის ტექნიკური დახმარების სამსახურის — THW-ის — 48-კაციანი გუნდის თვითმფრინავიც.
ორი ძლიერი მიწისძვრა — 7.2 და 7.5 მაგნიტუდის — ვენესუელის ჩრდილოეთ ნაწილში 24 ივნისს, ერთმანეთისგან მხოლოდ 39 წამის ინტერვალით მოხდა. ეს ქვეყნისთვის ბოლო 125 წლის განმავლობაში ყველაზე ძლიერი მიწისძვრები იყო.
განსაკუთრებით დაზარალდა ლა-გუაირას შტატი, რომელიც დედაქალაქ კარაკასის ჩრდილოეთით მდებარეობს. სწორედ აქ არის ქვეყნის საერთაშორისო აეროპორტი და ვენესუელის უმსხვილესი საზღვაო პორტი. ხელისუფლებამ მიწისძვრის გამო საგანგებო მდგომარეობა გამოაცხადა.
აშშ-ის ცუნამის გაფრთხილების ეროვნულმა ცენტრმა მომხდარს „სეისმური დუპლეტი“ უწოდა — ეს არის მოვლენა, როდესაც ერთსა და იმავე ზონაში დიდი მაგნიტუდის ორი მიწისძვრა რამდენიმე წამის სხვაობით ხდება.