5 აგვისტოს მთავრობის დადგენილებით დამტკიცებულ საგზაო უსაფრთხოების სტრატეგიაში წერია, რომ სიჩქარის გადაჭარბების პრევენციის მიზნით გაგრძელდება მუშაობა იმ სისტემის დანერგვაზე, რომელიც ვიდეოკამერებით დაფიქსირებული გადაჭარბების შემთხვევაში მძღოლს ავტომატურად შეუმცირებს ქულებს.
დოკუმენტის მიხედვით,ეროვნული ვიდეოსამეთვალყურეო სისტემა გაუმჯობესდება 112-თან კოორდინაციით.
მთელი ქვეყნის მასშტაბით დამონტაჟდება ახალი მოწყობილობები, განსაკუთრებით იმ მონაკვეთებზე, სადაც სიჩქარის გადაჭარბების რისკი მაღალია. პარალელურად, პრევენციული და საგანმანათლებლო კამპანიებით საზოგადოების ცნობიერების ამაღლება იგეგმება.
სტრატეგიაში ჩამოთვლილია სიჩქარის ეფექტური მართვის შესაძლო სარგებელი: საგზაო შემთხვევების, დაღუპულებისა და დაშავებულების რაოდენობის შემცირება, სოციალურ-ეკონომიკური ზიანის შემცირება, ჰაერის დაბინძურების, საწვავის მოხმარებისა და ხმაურის შემცირება, ქალაქის გზებზე მოძრაობის სტაბილურობის გაუმჯობესება, აგრეთვე ორთვლიანი ტრანსპორტისა და ქვეითების მობილობის გაზრდა.
გარდა ამისა, გაგრძელდება დასახლებულ პუნქტებში მაქსიმალური დასაშვები სიჩქარისა და ტოლერანტობის ზღვარის შემცირებაზე მუშაობა, თუმცა მხოლოდ ლიმიტის დაწევა საკმარისი არ არის. ამიტომ ეტაპობრივად დაინერგება კომპლექსური მიდგომა, რომელიც მოიცავს საგზაო ინფრასტრუქტურის გაუმჯობესებას, მკაცრ და თანმიმდევრულ სანქციებს (მათ შორის ქულების სისტემის უფრო ეფექტურ გამოყენებას), ცნობიერების ამაღლებასა და საშიშ მონაკვეთების („შავი წერტილების“) იდენტიფიცირებას.
