„მთელი სიმართლე დიანას შესახებ – მისი ძმის თვალით“ – ჩარლზ სპენსერმა თავის დას, პრინცესა დიანას, წიგნი მიუძღვნა.

ბრიტანეთის პრინცესა დიანას ძმამ, გრაფმა ჩარლზ სპენსერმა განაცხადა, რომ უახლოეს მომავალში გამოქვეყნდება მისი მოგონებების წიგნი დაზე, რომელიც თითქმის 30 წლის წინ დაიღუპა. მემუარები სახელწოდებით „გედის სიმღერა: ჩემი და დიანა“ (Swan Song: Diana, My Sister) დიდ ბრიტანეთში სექტემბერში უნდა გამოვიდეს.

სპენსერმა წიგნის დაწერის მოტივი ასე განმარტა:

„მსურს, დიანას სახელით ვილაპარაკო — და ეს აშკარად პოზიტიური კუთხით გავაკეთო“.

მისი თქმით, იმედოვნებს, რომ წიგნი ადამიანებს დაეხმარება უკეთ გაიგონ, სინამდვილეში როგორი იყო მისი და.

„ის ერთადერთი და განუმეორებელი იყო — ძალიან ენერგიული ადამიანი, სავსე სიყვარულით, ქარიზმითა და საკუთარ თავში ეჭვებით, — ამბობს ჩარლზი. — ის მთელი ძალით ცხოვრობდა და თავის შემდეგ ბევრად უკეთესი სამყარო დატოვა, მიუხედავად იმისა, რომ ასე ახალგაზრდა წავიდა“.

ამ წლის 1 ივლისს დიანას 65 წელი შეუსრულდებოდა. ის 1997 წელს, პარიზში მომხდარი ავტოკატასტროფის შედეგად, 36 წლის ასაკში დაიღუპა. მისი ვაჟები — პრინცები უილიამი და ჰარი — მაშინ შესაბამისად 15 და 12 წლის იყვნენ.

ახალი წიგნის გამოცემასთან დაკავშირებით გავრცელებულ განცხადებაში ჩარლზ სპენსერი წერს, რომ ბოლო პერიოდში, დიანას გარდაცვალებიდან 30 წლისთავის მოახლოების გამო, მას კვლავ მუდმივად სთხოვენ ინტერვიუებს.

„ამან დამარწმუნა, რომ აუცილებელია ერთხელ და სამუდამოდ ჩავწერო ჩემი საკუთარი აზრები და მოგონებები, ნაცვლად იმისა, რომ კვლავ და კვლავ დისკომფორტი განვიცადო იმ განცხადებების კითხვისას, რომელთაგან ბევრი მცდარ ფაქტებს ეფუძნება, მაგრამ დროთა განმავლობაში სიმართლედ დამკვიდრდა“, — ამბობს ჩარლზ სპენსერი.

სიტყვა დაკრძალვაზე

„ამ წიგნის მიზანია, დიანას შესახებ მთელი სიმართლე მისი ძმის თვალით მოვყვე — ისევე, როგორც ამის გაკეთებას ვცდილობდი მის დაკრძალვაზე სიტყვით გამოსვლისას“, — დასძინა სპენსერმა.

იგი გულისხმობდა სიტყვას, რომელიც 1997 წლის სექტემბერში, ვესტმინსტერის სააბატოში, დიანასთან გამოსამშვიდობებელ ცერემონიაზე წარმოთქვა.

სპენსერი იმედოვნებს, რომ მისი წიგნი დააინტერესებს მათ, ვინც დიანას სიცოცხლის პერიოდზე მოგონებებს „კვლავ აფასებს“.

დაკრძალვაზე წარმოთქმულ სიტყვაში სპენსერმა დიანა აღწერა როგორც „თანაგრძნობის, მოვალეობის გრძნობის, სტილისა და სილამაზის განსახიერება“. მისი თქმით, „მთელი მსოფლიოსთვის ის იყო უანგარო ადამიანურობის სიმბოლო და იმ ადამიანების უფლებებისთვის მებრძოლი, რომლებიც ნამდვილად გარიყულები იყვნენ“.

იმავე სიტყვაში მან ჟურნალისტებიც გააკრიტიკა და დიანას უწოდა ადამიანი, „რომელზეც თანამედროვე ისტორიაში ყველაზე მეტად ნადირობდნენ“. ამასთან, მან პირობა დადო, რომ პრინც უილიამსა და პრინც ჰარის დაიცავდა, რათა მათ იგივე ბედი არ სწეოდათ.

ჩარლზ სპენსერის მემუარები 22 სექტემბერს გამოვა. წიგნს გამოსცემს Penguin Michael Joseph, რომელიც Penguin Random House-ის ნაწილია.

„მართალია, ამ წიგნის გვერდებზე არაერთი ისეთი გამხელაა, რომელიც მნიშვნელოვან ყურადღებას მიიპყრობს, მაგრამ მკითხველები პირველად  და საბოლოოდ მიიღებენ იმ საყვარელი ქალის ღირსეულ ხსოვნისადმი მიძღვნილ ნაშრომს, როგორიც პრინცესა დიანა იყო“, — განაცხადა Penguin Random House UK-ის დირექტორმა დენიელ ბანიარდმა.