“ქართული ოცნების” პრემიერ-მინისტრი ირაკლი კობახიძე საფრანგეთის პრეზიდენტმა ემანუელ მაკრონმა კოსმოსის საკითხებისადმი მიძღვნილ პირველ საერთაშორისო სამიტზე მიიწვია, რომელიც 9-10 სექტემბერს პარიზში გაიმართება. ამის შესახებ ცნობას საქართველოს მთავრობის ადმინისტრაცია ავრცელებს.
ინფორმაციით, ღონისძიების თანათავმჯდომარეები საფრანგეთი და გერმანია იქნებიან. სამიტის ძირითადი თემები მეცნიერება, კვლევა, უსაფრთხოება და თავდაცვაა.
მაკრონმა კობახიძისადმი მიწერილ მოწვევაში აღნიშნა, რომ კოსმოსი დღეს ძალაუფლებისა და კეთილდღეობის მნიშვნელოვან ვექტორს წარმოადგენს, ხოლო ინდუსტრიული აქტორების დინამიზმი, სფეროს სამოქალაქო და სამხედრო ორმაგი დანიშნულების ზრდა და გამწვავებული კონკურენცია კოორდინირებულ მოქმედებას საჭიროებს. საფრანგეთის პრეზიდენტის განცხადებით, სამიტი შესაძლებლობას შექმნის, ხაზი გაესვას სახელმწიფოებს, კომპანიებსა და მრავალმხრივ აქტორებს შორის დიალოგისა და თანამშრომლობის მნიშვნელობას.
„ბატონო პრემიერ-მინისტრო, ძვირფასო ირაკლი, მაქვს პატივი, მოგიწვიოთ კოსმოსის საკითხებისადმი მიძღვნილ პირველ საერთაშორისო სამიტზე, რომელიც პარიზში, 9-10 სექტემბერს გაიმართება. დღეს, ისე როგორც არასდროს, კოსმოსი ძალაუფლებისა და კეთილდღეობის უმნიშვნელოვანეს ვექტორს წარმოადგენს. ინდუსტრიული აქტორების დინამიზმი, ამ სფეროს გაზრდილი სამოქალაქო და სამხედრო ორმაგი დანიშნულება და გამწვავებული კონკურენცია მოითხოვს კოორდინირებულ მოქმედებას, რათა სრულად მოხდეს მისი ტექნოლოგიური პოტენციალის რეალიზება და კოსმოსური ეკონომიკის მდგრადი და პასუხისმგებლიანი განვითარების დაჩქარება. სამიტი შექმნის შესაძლებლობას, ხაზი გაესვას დიალოგისა და თანამშრომლობის მნიშვნელობას არა მხოლოდ სახელმწიფოებს, არამედ კომპანიებსა და მრავალმხრივ აქტორებს შორის. ჩვენი ვალია, უკვე დღეიდან უზრუნველვყოთ კოსმოსური საქმიანობის მდგრადობა ჩვენი საერთო კეთილდღეობისა და მომავალი თაობების სასარგებლოდ: ეს სამიტი სწორედ ამ ამბიციის განმტკიცების საშუალებას იძლევა. ამასთან, მოგვეცემა შესაძლებლობა, წარმოვაჩინოთ ჩვენი კოსმოსური ინდუსტრიებისა და სააგენტოების ექსპერტიზა, ისევე როგორც ჩვენი თანამშრომლობის მაღალი სტანდარტი სამეცნიერო, ინდუსტრიულ, ტექნიკურ და ეკონომიკურ დონეებზე. ჩვენთვის განსაკუთრებით მნიშვნელოვანია, თქვენთან და სხვა მოწვეულ ქვეყნებთან ერთად განვსაზღვროთ სამიტის ფორმატი, რათა ღონისძიება მტკიცე განცხადებებითა და კონკრეტული ნაბიჯებით დასრულდეს. ჩვენი მიზანია, აღნიშნული შეხვედრა ვაქციოთ გამორჩეულ შესაძლებლობად კოსმოსური გამოწვევების მნიშვნელობის დასადასტურებლად და კოსმოსში იმ მრავალმხრივი თანამშრომლობის მხარდასაჭერად, რომელიც დღეს ისე საჭიროა, როგორც არასდროს. მაქვს თქვენი მხარდაჭერის იმედი და სიამოვნებით გიმასპინძლებთ პარიზში, 2026 წლის სექტემბერში. ბატონო პრემიერ-მინისტრო, მიიღეთ ჩემი უღრმესი პატივისცემა“, – აღნიშნულია ოფიციალურ მიწვევაში, რომელიც საქართველოს პრემიერ-მინისტრმა საფრანგეთის რესპუბლიკის პრეზიდენტ ემანუელ მაკრონისგან მიიღო.
პარიზის სამიტზე მოწვევა ეხმიანება საერთაშორისო ფორმატს, რომელშიც მონაწილეობას იღებენ სხვადასხვა ქვეყნის მთავრობის მეთაურები, დღის წესრიგში შემავალი თემატიკიდან — კოსმოსური ტექნოლოგიები, მეცნიერება და უსაფრთხოება — გამომდინარე. მოწვევის ტექსტი არ შეიცავს დამატებით ინფორმაციას საქართველოს კონკრეტული როლის შესახებ სამიტის ფარგლებში დაგეგმილ განხილვებში.