რუმინეთის შიდა დაზვერვის სამსახურმა (SRI) განაცხადა, რომ ქვეყნის ტერიტორიაზე რუსეთის ხელმძღვანელობით მზადდებოდა დივერსია, რომლის აღკვეთაც მოხერხდა. უწყების ცნობით, სამშაბათს, 8 სექტემბერს, დააკავეს რუმინეთში მცხოვრები რუსეთის მოქალაქე.
რუმინეთის დაზვერვის ინფორმაციით, დაკავებულმა რუსი კურატორებისგან მიიღო დავალება, ფოტო და ვიდეო გადაეღო სტრატეგიული სამხედრო მნიშვნელობის ობიექტებისთვის, მათ შორის საკომუნიკაციო კვანძებისთვის, ნატოს მოკავშირეების მიერ გამოყენებული სამხედრო ბაზებისთვის, თავდაცვისა და სახელმწიფო უსაფრთხოების სფეროსთან დაკავშირებული დაწესებულებებისთვის, ასევე კრიტიკული ინფრასტრუქტურის ობიექტებისთვის.
უკრაინულ სატვირთო თვითმფრინავებს უთვალთვალებდა
SRI-ის პრესრელიზის თანახმად, მას ასევე უნდა გადაეღო უკრაინული სატვირთო თვითმფრინავები „ანტონოვი“. ერთ-ერთი ასეთი თვითმფრინავის წინააღმდეგ თავდასხმა 4 აგვისტოს გერმანიაში, ლაიფციგის აეროპორტში აღკვეთეს. გერმანიის ხელისუფლებამ ამ დივერსიის მცდელობაში ოფიციალურად რუსეთი დაადანაშაულა.
„მოპოვებული მონაცემები მიუთითებს საქმიანობაზე, რომელიც ჰგავს რუსეთის ფედერაციის სტრუქტურების მიერ კოორდინირებული დივერსიული ქსელების მოქმედებებს ევროპის მასშტაბით“, — განაცხადეს რუმინეთის დაზვერვაში.
უწყების ცნობით, დაკავებული რუსეთის მოქალაქე SRI-ის მეთვალყურეობის ქვეშ 2026 წლის თებერვლიდან იმყოფებოდა და ფიგურირებდა ფართომასშტაბიან გამოძიებაში, რომელიც რუმინეთის ტერიტორიაზე დივერსიული აქტების შესაძლო განხორციელებას ეხებოდა.
რუმინული მედიის ინფორმაციით, 40 წლის რუსეთის მოქალაქე ორგანიზებულ დანაშაულსა და ტერორიზმთან ბრძოლის სამმართველოს თანამშრომლებმა დააკავეს. რუმინეთის სპეცსამსახურში ასევე განაცხადეს, რომ დივერსიის აღკვეთას ხელი შეუწყო საერთაშორისო პარტნიორებთან თანამშრომლობამ.
დივერსიების ფართომასშტაბიანი ტალღა ევროპაში
აგვისტოს დასაწყისიდან რამდენიმე ევროპულ ქვეყანაში ერთდროულად დივერსიების ფართომასშტაბიანი ტალღა დაფიქსირდა. კერძოდ, 4 აგვისტოს ლაიფციგის აეროპორტში უკრაინულ სატვირთო თვითმფრინავ An-124-ზე თავდასხმის მცდელობა მოხდა. თავდასხმაში რამდენიმე დრონი მონაწილეობდა, თუმცა საბოლოოდ არც ერთი უპილოტო საფრენი აპარატი არ აფეთქებულა.
რამდენიმე ქვეყანაში თავდასხმის სამიზნე გახდა თავდაცვის ინდუსტრიის ობიექტებიც. კერძოდ, 15 აგვისტოს ტალინში ბოროტმოქმედებმა ცეცხლი წაუკიდეს თავდაცვის კომპანია Milrem Robotics-ის შენობას. კომპანია უკრაინის შეიარაღებულ ძალებს უპილოტო სახმელეთო აპარატებს აწვდის.
25 აგვისტოს სლოვაკეთის პროკურატურამ განაცხადა, რომ აღკვეთილი იყო უკრაინული დრონების მწარმოებელ Skyeton-ის ქარხანაში ხანძრის გაჩენის მცდელობა, ხოლო 31 აგვისტოს ცნობილი გახდა პოლონეთში, ვარშავის მახლობლად მდებარე უპილოტო საფრენი აპარატების ქარხანაში მსგავსი დივერსიის შესახებ.
გარდა ამისა, აგვისტოში ძლიერი ხანძრები და აფეთქებები მოხდა იტალიასა და ბულგარეთში მდებარე იარაღის მწარმოებელ მსხვილ საწარმოებში.
ბრიტანული გაზეთი The Telegraph, სპეცსამსახურების წარმომადგენლებზე დაყრდნობით, წერდა, რომ ამ თავდასხმების სერიის უკან რუსეთი დგას. გამოცემის ინფორმაციით, რუსეთი ადგილობრივი კრიმინალური ჯგუფების წევრებს ქირაობს თავდაცვის საწარმოებისთვის ზიანის მისაყენებლად და ამ გზით ამოწმებს, რამდენად მზად არის ნატო საპასუხო მოქმედებებისთვის.