თურქეთის პოლიციამ შაბათ-კვირას ჩატარებული რეიდების ფარგლებში სულ მცირე 162 ადამიანი დააკავა და ექვსი LGBTQ+ ორგანიზაციის ოფისი გაჩხრიკა. ხელისუფლების განცხადებით, ოპერაციები ქვეყნის მიერ „ოჯახური ღირებულებების დაცვის“ კამპანიის ნაწილია.
ანკარაში მოქმედმა LGBTQ+ უფლებადამცველმა ორგანიზაციამ Kaos GL-მა განაცხადა, რომ დაკავებების გარდა, ხელისუფლებამ ათობით ვებსაიტსა და სოციალურ ქსელში არსებულ ანგარიშზე წვდომაც შეზღუდა. ეს ანგარიშები პარტნიორ ორგანიზაციებსა და უფლებადამცველებს ეკუთვნოდა.
ხელისუფლება აცხადებს, რომ „ოჯახებისა და ბავშვების დაცვის“ მოვალეობას ასრულებს
თურქეთის იუსტიციის მინისტრმა აკინ გურლექმა განაცხადა, რომ გამოძიებები, რომლებიც პროსტიტუციისა და უხამსობის შესახებ ბრალდებებს უკავშირდება, სტამბოლის, ანკარის, იზმირის, აიდინისა და მერსინის პროკურატურების მიერ იყო კოორდინირებული.
მისი თქმით, 15 პროვინციაში სამართლებრივი პროცედურები დაიწყო 162 ეჭვმიტანილის, ცხრა ორგანიზაციისა და 13 ბიზნესის წინააღმდეგ.
„კონსტიტუციით სახელმწიფოსთვის დაკისრებული ოჯახებისა და ბავშვების დაცვის მოვალეობის შესაბამისად, არ იქნება შეწყნარებული არცერთი კრიმინალური ორგანიზაცია, ძალადობის ქსელი ან უკანონო საქმიანობა, რომელიც ბავშვებს, ახალგაზრდებს ან ოჯახებს ემუქრება“, — დაწერა გურლექმა სოციალურ ქსელში.
ხელისუფლების ცნობით, შაბათ-კვირის ოპერაციების დროს, რომლებიც გეი-ბარებს, ღამის კლუბებსა და ერთ-ერთ ჰამამს შეეხო, ამოღებულია ნარკოტიკები, ციფრული მოწყობილობები, კონტრაბანდული ალკოჰოლი და ცეცხლსასროლი იარაღი. ჰამამი, როგორც ითქვა, პროსტიტუციის ადგილად გამოიყენებოდა.
სტამბოლის პროკურატურამ ასევე განაცხადა, რომ აღმოაჩინა მტკიცებულებები, რომლებიც მიუთითებს, რომ ბავშვებსა და არასრულწლოვნებზე სექსუალური ორიენტაციისა და გენდერული იდენტობის საკითხებში „არასათანადო ზეგავლენა“ ხდებოდა.
უფლებადამცველი ჯგუფები აცხადებენ, რომ ხელისუფლება LGBTQ+ თემს უსამართლოდ და მიზანმიმართულად დევნის. Kaos GL-ის თქმით, მათ ბრალად დასდეს ბავშვებისთვის ისეთი მასალების ხელმისაწვდომობა, რომლებიც ხელისუფლებამ „უხამს შინაარსად“ შეაფასა.
ერდოღანი შობადობის შემცირებაში LGBTQ+ „გარყვნილებს“ ადანაშაულებს და რეალურ მიზეზებს გვერდს უვლის
შაბათ-კვირას ჩატარებულ პოლიციურ ოპერაციას ხელისუფლებამ „ჩემი ოჯახი უსაფრთხოდაა“ უწოდა. ის პრეზიდენტ რეჯეფ თაიფ ერდოღანის „ოჯახისა და მოსახლეობის ათწლეულის“ პროგრამის ნაწილია, რომლის მიზანია დაბერებად ქვეყანაში მკვეთრად შემცირებული შობადობის ზრდა.
ხელისუფლების განცხადებით, კამპანია იმისთვისაა შექმნილი, რომ საზოგადოებამ LGBTQ+ აქტივობა „ნორმად“ არ აღიქვას, ხოლო რეიდები „ბავშვების, ოჯახის ინსტიტუტისა და ჩვენი საერთო მორალური ღირებულებების დასაცავად“ ტარდება.
მიუხედავად იმისა, რომ თურქეთში ერთსქესიანი ურთიერთობები უკანონო არ არის, ჰომოფობია ფართოდ არის გავრცელებული, ხოლო პრეზიდენტი ერდოღანი თურქეთში შობადობის სწრაფ შემცირებაში LGBTQ+ „გარყვნილებს“ ადანაშაულებს.
თუმცა ეს უფრო რიტორიკულ მცდელობას ჰგავს, ყურადღება გადაიტანოს შობადობის შემცირების რეალური და კომპლექსური მიზეზებიდან. ერდოღანმა, რომელიც 2014 წლიდან ქვეყნის ავტორიტარული პრეზიდენტია და მანამდე ათი წლის განმავლობაში გავლენიანი პრემიერ-მინისტრი იყო, შობადობის ვარდნას „კატასტროფა“ უწოდა.
თურქეთის სტატისტიკის სამსახურის, TurkStat-ის მონაცემებით, 2013-დან 2023 წლამდე შობადობის ჯამური კოეფიციენტი მკვეთრად შემცირდა — 2.11-დან 1.51-მდე. თუმცა ამ ცვლილებამ თურქეთში შობადობის მაჩვენებელი სხვა განვითარებული ქვეყნების დონეს მიუახლოვა.
დამკვირვებლების შეფასებით, შობადობის შემცირების რეალური მიზეზები უფრო მეტად სტრუქტურული და ინსტიტუციური ხასიათისაა და არა ცხოვრების წესთან დაკავშირებული.
თურქეთის ხანგრძლივი და გაღრმავებული ფინანსური კრიზისი, ინფლაცია, საცხოვრებლის ფასების მკვეთრი ზრდა, ოჯახებისთვის არახელსაყრელი სამუშაო გარემო, ხელმისაწვდომ საბავშვო მოვლაზე შეზღუდული წვდომა, ასევე ქალთა განათლებისა და დასაქმების უფრო მაღალი დონე — ეს ყველაფერი განიხილება მიზეზებად, რის გამოც თურქები შვილის გაჩენას უფრო გვიან გეგმავენ და საბოლოოდ ნაკლები შვილი ჰყავთ.