რუსეთის სახელმწიფო რკინიგზის (РЖД) შვილობილი ტურისტული კომპანია „რჟდ ტური“ (РЖД Тур), რომელიც სპეციალიზებულია სარკინიგზო კრუიზებისა და ტურების მოწყობაზე როგორც რუსეთის შიგნით, ისე მის ფარგლებს გარეთ, ერევანსა და თბილისს შორის სარკინიგზო კრუიზს იწყებს. ამის შესახებ თავად კომპანიის ვებგვერდზე დევს ინფორმაცია.
„მიმდინარე წლის შემოდგომაზე რუსი მოგზაურები პირველად შეძლებენ საზღვარგარეთის სარკინიგზო კრუიზში გამგზავრებას — ტურისტები სომხეთსა და საქართველოს ეწვევიან. „რჟდ ტური“ პირველ მატარებელს რეისში 30 ოქტომბერს გაუშვებს“ – ნათქვამია განცხადებაში.
სამდღიანი საერთაშორისო მოგზაურობა, სახელწოდებით „კავკასიის ორი გული“, სტარტს ერევანში აიღებს, სადაც ტურისტებმა დამოუკიდებლად უნდა ჩააღწიონ. ტურის ღირებულება ერთ ადამიანზე მინიმუმ 63 ათასი რუბლიდან იწყება.
ტურისტები ღამეებს მატარებელში გაატარებენ, ხოლო დღის განმავლობაში სომხეთისა და საქართველოს ღირსშესანიშნაობებს გაეცნობიან.
მოგზაურები პირველ დღეს ერევანში გაატარებენ. საექსკურსიო პროგრამა მოიცავს მაშტოცისა და ბაგრამიანის პროსპექტებს, კასკადის კომპლექსს და ჩრდილოეთის პროსპექტს. გარდა ამისა, ტურისტები ეწვევიან ერევნის კონიაკის ქარხანას, სადაც პროდუქციის დეგუსტაციას შეძლებენ.
მეორე დღე თბილისში მიმოხილვითი ექსკურსიით დაიწყება, ხოლო სადილის შემდეგ ტურისტები მცხეთას ესტუმრებიან, სადაც ჯვრის მონასტერს, სვეტიცხოვლის საკათედრო ტაძარსა და სამთავროს მონასტერს მოინახულებენ.
ტურის დასკვნით დღეს მოგზაურები ისევ სომხეთში ჩავლენ, სადაც კიდევ ერთხელ სხვადასხვა ღირსშესანიშნაობას მოინახულებენ და იქიდან, როგორც ჩასვლის შემთხვევაში, ტურის დასრულების შემდეგ ერევნიდან უკანაც თავად გაემგზავრებიან.
სომხეთის სარკინიგზო სისტემის მმართველი კომპანია „სამხრეთ კავკასიის რკინიგზა“ 100%-ით რუსეთის სახელმწიფო რკინიგზის შვილობილი კომპანიაა.აღნიშნული ტურიც სწორედ ამ ადგილობრივი, სომხური ქვედანაყოფის ჩართულობითა და მათივე კუთვნილი ლოკომოტივებითა და მატარებლებით განხორციელდება. „რჟდ ტური“ კი მთავარი ტუროპერატორის როლში გამოდის, რომელიც რუსეთში ბილეთების გაყიდვასა და მარკეტინგს უზრუნველყოფს.