რუსეთის მიერ ოკუპირებულ ხერსონის ოლქის ქალაქ ოლეშკიში შექმნილი კრიტიკული ვითარების გამო, ევროპარლამენტის ვიცე-პრეზიდენტმა პინა პიჩიერნომ პროტესტის უკიდურეს ფორმას მიმართა და შიმშილობა გამოაცხადა. ევროპარლამენტარმა საერთაშორისო ჰუმანიტარულ ორგანიზაციებსა და მთავრობებს მოუწოდა, ყურადღება მიაქციონ ქალაქში არსებულ მძიმე მდგომარეობას და საერთაშორისო რეაგირება მოხდეს.
„ჩვენ უნდა მოვითხოვოთ დაუყოვნებლივი ჰუმანიტარული ზავი, საკვებისა და მედიკამენტების შეტანა და იმ მშვიდობიანი მოქალაქეების უსაფრთხო ევაკუაციის შესაძლებლობა, რომლებსაც ქალაქის დატოვება სურთ“, — განაცხადა პინა პიჩიერნომ.
რუსეთის სამხედრო ძალების კონტროლქვეშ მყოფი ქალაქის მცხოვრებლები თვეების განმავლობაში რჩებიან ელექტროენერგიის, საკვებისა და ნორმალური სამედიცინო დახმარების გარეშე, მუდმივი ორმხრივი ცეცხლის პირობებში. მოხალისეების ინფორმაციით, საკვებისა და მედიკამენტების ბოლო ოფიციალური შეტანა მიმდინარე წლის მაისის ბოლოს განხორციელდა. ქალაქის დატოვება ამჟამად პრაქტიკულად შეუძლებელია, რადგან გასასვლელების უმეტესობა დანაღმულია, ხოლო ნებისმიერი გადაადგილება უპილოტო საფრენი აპარატების კონტროლის ქვეშაა.
ამასთან, დღეს ცნობილი გახდა, რომ უკრაინა და რუსეთი მშვიდობიანი მოსახლეობის გამოყვანის პირობებზე შეთანხმებასთან ახლოს არიან. უკრაინის უმაღლესი რადის ადამიანის უფლებათა კომისარმა, დმიტრო ლუბინეცმა, ხოლო მოგვიანებით რუსეთის პრეზიდენტის პრესმდივანმა, დიმიტრი პესკოვმა დაადასტურეს, რომ კიევი და მოსკოვი ამჟამად შექმნილი სიტუაციის გადაჭრაზე მუშაობენ.
ლუბინეცის განცხადებით, მხარეები ამჟამად ლოკალური ცეცხლის შეწყვეტისა და უსაფრთხო დერეფნების ბოლო დეტალებს ათანხმებენ. წინასწარი გეგმის მიხედვით, ევაკუაცია განხორციელდება არა რუსეთის ან ბელარუსის მიმართულებით, არამედ პირდაპირ უკრაინის ხელისუფლების მიერ კონტროლირებად ტერიტორიაზე. ჰუმანიტარული ოპერაცია, თავად ქალაქის გარდა, მის მიმდებარე 6 დასახლებასაც შეეხება, სადაც მათ შორის 200-მდე ბავშვი იმყოფება. მიუხედავად მნიშვნელოვანი პროგრესისა, უსაფრთხოების დერეფნის ამოქმედების ზუსტი თარიღი ჯერჯერობით ოფიციალურად არ სახელდება.