რუსთაველის გამზირის სარეაბილიტაციო სამუშაოების დასრულება დეკემბრის ბოლომდე გადაიდო. თბილისის მერიასა და პროექტის კონტრაქტორ კომპანია სმარტ სოლუშენსს შორის 30 ოქტომბერს გაფორმებული ხელშეკრულების ცვლილებით, სამუშაოების შესრულების ვადა 100-დან 130 კალენდარულ დღემდე გაიზარდა. სამუშაოების გახანგრძლივების მიზეზად მითითებულია “რიგი გაუთვალისწინებელი მოვლენები და ნალექები”. ინფორმაციას BM.GE ავრცელებს.
“საპროექტო ობიექტზე საკუთარი ქსელების რეაბილიტაციას ახორციელებდა არაერთი კომუნიკაციის კომპანია, რაც შპს “სმარტ სოლუშენსს” უზღუდავდა ერთიანი სამუშაო ფრონტის არსებობას და წარმოადგენდა მნიშვნელოვან შემაფერხებელ გარემოებას”, – ნათქვამია ხელშეკრულების ცვლილებაში.
BM.GE-ს ცნობით, სმარტ სოლუშენსი ასევე მიუთითებს უამინდობას და წერს, რომ 1 აგვისტოდან 26 ოქტომბრამდე პერიოდში 29 ნალექიანი დღე იყო, რაც “სამუშაოების შესრულებას ზღუდავდა არა მხოლოდ ნალექიან დღეებში, არამედ მომდევნო დღეებშიც”.