კორონავირუსით სერიოზულად დაავადებულ პაციენტთა 30%–ს მწვავე ტრომბოზის ნიშნები აქვთ. ასეთ საგანგაშო დასკვნამდე მივიდნენ ბრიტანელი სამედიცინო ექსპერტები
ტრომბები, რომლებიც სისხლში ჩნდება შესაძლოა ბევრი სიკვდილის მიზეზი იყოს. ისინი ფილტვების სეროიზული ანთების შედეგად ჩნდება, რაც ვირუსის არსებობაზე ორგანიზმის ბუნებრივი რეაქციაა.
ამასთან, პაციენტებს მთელ მსოფლიოში ბევრი გართულება აქვთ, რომელსაც ვირუსი იწვევს და რომლებიც შესაძლოა სიკვდილის მიზეზი გახდეს.
მარტში, როცა კორონავირუსის პანდემია მთელ მსოფლიოში აღმავლობის სტადიაზე იყო, ექიმებმა მთელ მსოფლიოში შენიშნეს ტრომბოზის აშკარად მოხშირებული შემთხვევები.
სხვა უსიამოვნო აღმოჩენებს შორის იყო კორონავირუსით დაავადებულთა ფილტვებში ასობით მიკროტრომბის აღმოჩენა.
ვირუსი ასევე იწვევს ღრმა ვენების ტრომბოზს, რომელიც როგორც წესი ფეხებს აზიანებს. როდესაც ტრომბი მოწყდება, ის ფილტვებისკენ მოძრაობს და სისხლძარღვებს ახშობს, რაც ძალიან საშიშია სიცოცხლისთვის.
“ბოლო კვირებში ძალიან ბევრი ინფორმაცია შემოდიოდა და აშკარა გახდა, რომ ტრომბოზი დიდი პრობლემაა. განსაკუთრებით კორონავირუსით დაავადებული მძიმე პაციენტებისთვის. ბოლო კვლევამ გვიჩვენა, რომ ასეთ დაავადებულთა თითქმის ნახევარს ფილტვის ემბოლია აქვს, ან ფილტვებში სისხლის კოლტები.“– ამბობს ლონდონის სამეფო კოლეჯთან არსებული საავადმყოფოს პროფესორი რუპენ არია.
ის ვარაუდობს, რომ კორონავირუსით სერიოზულად დაავადებულ პაციენტთა რაოდენობა, ვისაც ტრომბები უყალიბდება ბევრად მაღალია, ვიდრე 30%, რაზეც ევროპის ოფიციალურ მონაცემებშია საუბარი.
მეცნიერთა ჯგუფი მისი მეთაურობით საავადმყოფოს პირობებში იკვლევს, როგორ ცვლის და ასქელებს კორონავირუსი პაციენტთა სისხლს. გასქელებული სისხლი კი ტრომბების ჩამოყალიბებას იწვევს.
სისხლში ასეთი ცვლილებები ფილტვების ძლიერი ანთების შედეგად ხდება, რაც ვირუსზე ორგანიზმის რეაქციაა.
“მძიმედ დაავადებულ პაციენტებში ჩვენ ვხედავთ სისხლში ქიმიური ნივთიერებების გამოტყორცნას, რომლებიც ტრომბების ჩამოყალიბების აქტივაციას აკეთებენ“– ამბობს პროფესორი არია.
ეს კი, თავის მხრივ ავადმყოფთა მდგომარეობის გაუარესებას იწვევს.
ტრომბოზების სპეციალისტის, პროფესორ ბევერლი ჰანტის თქმით, გასქელებული სისხლი საშიშია არა მხოლოდ იმით, რომ ტრომბების ჩამოყალიბებას იწვევს. ის ასევე გულის შეტევების და ინსულტების საფრთხეს ზრდის და სიკვდილიანობის მაჩვენებლის გაზრდას იწვევს.
ამ პრობლემებს ემატება ისიც, რომ დღეისათვის სისხლის გათხევადებისთვის გამოყენებული საშუალებები ყოველთვის არ მუშაობს. მათი დოზების მნიშვნელოვნად მომატებამ კი შესაძლოა სისხლდენა გამოიწვიოს, რაც მომაკვდინებელი შეიძლება აღმოჩნდეს.
პროფესორი არია ამბობს, რომ აუცილებელია წონასწორობის დაცვა ტრომბოზის მკურნალობასა და სისხლდენის პროვოცირებას შორის.
საბედნიეროდ, მედიკოსები მთელი მსოფლიოდან გაერთიანდნენ ვირუსით გამოწვეული ტრომბოზის უსაფრთხო და ეფექტური მკურნალობის მეთოდების ძებნაში.
უკვე მიმდინარეობს კლინიკური კვლევები მედიკამენტების ოპტიმალური დოზის მოსაძებნად, რომლებიც სისხლს ათხევადებენ და რომელსაც საყოველთაოდ გამოიყენებენ.
ამის მიუხედავად, ზოგიერთი სპეციალისტი ვარაუდობს, რომ პრობლემა სხვაგვარად შეიძლება გადაიჭრას: უნდა მოიძებნოს შესაძლებლობა, სწორედ ფილტვების მწვავე ანთება განეიტრალდეს, რაც ტრომბების წარმოქმნას იწვევს.