გუშინ, 22 მარტს საქართველოს მთავრობამ ბოლნისისა და მარნეულის მუნიციპალიტეტებში მკაცრი საკარანტინე რეჟიმი დააწესა მას შემდეგ, რაც მარნეულში კორონავირუსის შიდა გადაცემის შემთხვევა დაფიქსირდა.
მარნეულის და ბოლნისის მუნიციპალიტეტებში მკაცრად იზღუდება მოქალაქეების შესვლა-გამოსვლა, შესაბამისად საზოგადოების გარკვეულ ნაწილში გაჩნდა შიში რამდენად უსაფრთხოა ამ რეგიონებიდან ჩამოტანილი სასოფლო-სამეურნეო პროდუქტები.
ამის შესახებ ინფორმაციას AMBEBI.GE ავრცელებს. ისინი დაუკავშირდნენ სპეციალისტებს იმის გასარკვევად, არის თუ არა საშიში მარნეულსა და ბოლნისში მოყვანილი ხილ-ბოსტნეული და სხვა პროდუქტები ჯანმრთელობისთვის და რამდენად მაღალია ალბათობა იმისა, რომ იგი კორონავირუსის გავრცელების წყაროდ იქცეს.
სურსათის ეროვნულ სააგენტოს საზოგადოებასთან ურთიერთობის განყოფილების ხელმძღავანელმა თეა შველიძემ განაცხადა, რომ მოსახლეობამ ამ შემთხვევაშიც უნდა იხელმძღვანელოს იმ ზოგადი რეკომენდაციებით, რაც სააგენტომ გასცა.
“ამ კონკრეტულ შემთხვევაში როგორ მოხდება პროდუქტების შეტანა და გამოტანა ამ მუნიციპალიტეტებიდან, ვერაფერს გეტყვით. სურსათთან დაკავშირებით ჩვენ რეკომენდაციები არერთხელ გავეცით, თუ როგორ უნდა მოიქცენ აგრარული ბაზრები, მომხმარებლები და რა უნდა გაითვალისწინონ პროდუქტების შეძენისას. ამიტომ ახალს ვერაფერს ვიტყვით ამ მიმართულებით.
მნიშვნელოვანია, დაცული იყოს ის რეკომენდაციები, რაც გავრცელებულია სურსათის ტრანსპორტირებისა და გაყიდვასთან მიმართებაში. ყველა აგრარულ ბაზარს აქვს შესაბამისი რეკომენდაციები, რომ ხშირად მოხდეს ტერიტორიების რეცხვა-დეზინფექცია, ასევე ხშირად უნდა მოხდეს პერსონალის პირადი ჰიგიენის დაცვის კონტროლი – ხელთათმანები, პირბადეები, თავსაბურავები.
მომხმარებლები ნუ შეეხებიან ზედმეტად პროდუქტებს ყიდვისას, გამოიყენონ ხელთათმანები და სახლში მიტანილი პროდუქტები დაამუშაონ საფუძვლიანად. ეს არის ის ზოგადი რეკომენდაციები, რაც ჩვენ გავეცით აქამდე“
- გაზარდეთ რეცხვა-დეზინფექციის სიხშირე;
- შესაძლებლობის მიხედვით გამოიყენეთ სადეზინფექციო და სარეცხი საშუალებებისათვის დაშვებული მაქსიმალური კონცენტრაცია;
- სველ წერტილებთან განათავსეთ ხელის დაბანის ინსტრუქცია;
- გამოყენებული ერთჯერადი პარკების, ხელსახოცების, პირბადეების, ხელთათმანების ჩასაყრელად განათავსეთ ნაგვის ურნები, მექანიკური (ფეხით) ასახდელი თავსახურებით;
- ნაგვის ურნების შიგთავსი მოათავსეთ პლასტიკის პარკებში და თავი მჭიდროდ მოუკარით, შემდეგ მეორე პარკში, რომელსაც თავს ასევე მჭიდროდ მოუკრავთ;
- ნაგვის ურნები დაცალეთ სათანადო სიხშირითა და პირობების დაცვით;