„ივანიშვილს ხელისუფლებაში მოსვლა უნდოდა 2003 წლამდეც, როდესაც შევარდნაძე თავის ვადას ამოწურავდა, მაგისთვის ემზადებოდა“ – ეს განცხადება ყოფილმა თავდაცვის მინისტრმა ირაკლი ოქრუაშვილმა ტელეკომპანია „კავკასიის“ გადაცემა „ბარიერში“ გააკეთა, სადაც ივანიშვილ–სააკაშვილის ურთიერთობებზე, მათ თანამშრომლობაზე და დაპირისპირებაზე ისაუბრა. მისი თქმით, მაშინ ივანიშვილის ყველა მოქმედება ამაზე მიუთითებდა. ოქრუაშვილის მტკიცებით, ივანიშვილი როგორც 2012 წლამდე იყო ჩასაფრებული მონადირესავით და ელოდებოდა გაჩუმებული თავის დროს, ასე იყო ჩასაფრებული 2003 წლამდეც, თუმცა მაშინ გეგმა ჩაეშალა, რის შემდეგაც სააკაშვილის ხელისუფლებასთან თანამშრომლობა დაიწყო. ოქრაშვილის თქმით, სააკაშვილი იმდენად მოიხიბლა ივანიშვილით და მისი დახმარებით, რომ პრემიერ მინისტრად მისი დანიშვნაც უნდოდა, თუმცა ზურაბ ადეიშვილმა გადააფიქრებინა.
„ივანიშვილს ცხვირწინ ავაცალეთ ხელისუფლება 2003 წელს. პირველივე ურთიერთობის დროს, მან გამოაცხადა სრული კაპიტულაცია ისე, რომ 2006 წლამდე, მისი ხელისუფლებაში ყოფნის პერიოდში ივანიშვილმა სააკაშვილის ხელისუფლებას 400 მილიონი დოლარი მისცა. „ვერ ვიტან უმადურობას, არ მინდა უმადური ადამიანის როლში გამოვიდე, მას ეს არ უნდა დავუკარგოთ, ბუნებრივია, მისი ფული იყო და იხარჯებოდა, მაგრამ მთავარია, როგორ და რატომ“ – განაცხადა თავდაცვის ყოფილმა მინისტრმა. მისივე განმარტებით, ივანიშვლის არ უნდოდა გაბმულიყო მახეში, როგორც გაება ბადრი პატარკაციშვილი და ყიდულობდა სიმშვიდეს და უსაფრთხოებას.
„გაშლილ სუფრაზე მოვიდა ივანიშვილი, დაჯდა თამადასავით და ამავე ფორმატით აგრძელებს“- ამბობს ოქრუაშვილი 2011 წელს ივანიშვილის პოლიტიკაში, 2012 წელს კი ხელისუფლებაში მოსვლაზე.
ჟურნალისტის შეკითხვას, როდის და რატომ გაფუჭდათ ივანიშვილისა და სააკაშვილის ურთიერთობა, ოქრუაშვილმა უპასუხა, რომ 2009 წლის ბოლომდე ივანიშვილს სააკაშვილთან კარგი ურთიერთობა ჰქონდა. „7 ნიოემბერიც კარგად გადაყლაპა, აგვისტოს ომიც კარგად გადაყლაპა და 2009 წლის ბოლომდეც ტკბილად იყო სააკაშვილთან. სააკაშვილთან ურთიერთობა შეწყვიტა მაშინ, როცა ჩათვალა, რომ ხელსაყრელი მომენტი იყო ურთიერთობის შესაწყვეტად და დასაპირისპირებლად“ – განაცხადა ირაკლი ოქრუაშვიმა.
