“ქართული ოცნების” თავმჯდომარე, ბიძინა ივანიშვილი აცხადებს, რომ ადამიანებზე ზრუნვა ქართული ოცნების ხელწერად იქცა. მთაწმინდის პარკში, ოცნების საპარლამენტო სიის პირველი ოცეულის წარდგენაზე სიტყვით გამოსვლისას მან ოცნების დადებით მხარეებზე ისაუბრა. ივანიშვილი მისი ხელისუფლების მიღწევად კორონასთან გამკლავებას თვლის:
“მარტივია, როდესაც შეფასება და კრიტიკაა შენი საქმე. არაფერზე პასუხისმგებლობა გაგაჩნია და ხშირად ტყუილსაც კადრულობ იმ იმედით, რომ ამაზე პასუხს არავინ მოგთხოვს.
დარწმუნებული ვარ, ჩვენ ისევე წარმატებით მოვიგებთ ბრძოლას სიცრუესთან და ხალხში ნეგატივის, უიმედობის, დათესვის მცდელობასთან, როგორც ვაჯობეთ ზოგადსაკაცობრიო გამოწვევას კრიზისის ყველაზე რთულ ეტაპზე. ჩვენი ხალხი კარგად ხედავს, რომ “ქართულმა ოცნებამ” პრაქტიკულად ყველა მიმართულებით შეძლო ქვეყნის შეუქცევადი განვითარება. თამამად ვიტყვი, ჩვენ პირნათელი ვართ ხალხის წინაშე. ვაკეთებთ მაქსიმუმს, რის შესაძლებლობასაც ჩვენი ქვეყნის ეკონომიკა იძლევა.
ვადგავართ იმ გზას, რომელიც ნაბიჯ-ნაბიჯ მიგვიყვანს მიზნამდე. ჩვენ სწორ და თანმიმდვრულ მიდგომებს, პოლიტიკურ და ეკონომიკურ სტრატეგიას იწონებენ და მხარში გვიდგანან ჩვენი პარტნიორი და მეგობარი ქვეყნები. მაგრამ რაც ყველაზე მნიშვნელოვანია, ამას აღიარებს ჩვენი ხალხი და ამიტომაც დარმწუნებული ვართ, კვლავ უპირობო გამარჯვებული გამოვალთ იმ პოლიტიკურ კონკურენციაში, რომელმაც რამდენიმე დღის წინ აიღო სტარტი”–თქვა ივანიშვილმა.
დღეს “ქართული ოცნების” პროროპოციული სიის პირველი 20-ეული დასახელდა. თავად ივანიშვილი სიაში არ არის.
