მოდის ქართველი დიზაინერი, Balenciaga-ს მოდის სახლის შემოქმედებითი დირეტორი, დემნა გვასალია Times UK–სთვის მიცემულ ინტერვიუში ამბობს, რომ საცხოვრებლად საქართველოში არ დაბრუნდება, რადგან საქართველო მისთვის უსაფრთხო არ არის. გამოცემასთან ინტერვიუში ის თავის შვეიცარიულ ცხოვრებაზეც ყვება და განმარტავს, რატომ აირჩია საცხოვრებალდ შვეიცარია:
– მიუხედავად იმისა, რომ ბელგიური მოდის სკოლას ეკუთვნი, პარიზიდან საცხოვრებლად შვეიცარიაში გადახვედი და არა ბელგიაში, რატომ?
– დემნა: უნდა ვთქვა, რომ თავიდან ბელგიას ვფიქრობდი, მაგრამ შვეიცარიაში ცხოვრებაზე ყოველთვის ვოცნებობდი, მიყვარს შვეიცარიის ბუნება და სიმშვიდე. თან შვეიცარია იმ ადგილს ჰგავს, სადაც მე ვიზრდებოდი.
– გიფიქრია, რომ შეიძლება საქართველოში დაბრუნდე?
– დემნა: საცხოვრებლად? არა. უსაფრთხო არ არის, განსაკუთრებით ჩემნაირი ადამიანებისთვის. ჩემს ცხოვრებას შვეიცარიაში ვხედავ, ამიტომ გადმოვიტანე ყველაფერი აქ. არსად მიგვრძვნია თავი იმდენად დაცულად და კარგად როგორც აქ.
– როგორია შენი ცხოვრება შვეიცარიაში?კრონენჰალეში ვახშმობ და ციურიხის ტბასთან სეირნობ?
– დემნა: კრონენჰალეში მართლა ხშირად დავდივარ, სტუმართა წიგნშიც ვარ [იცინის], მიხარია, რომ ვეგანური კერძები დაამატეს, ერთიდაიგივეს ჭამა აღარ მიწევს. სხვა მხრივ, ძალიან ჩვეულებრივი ცხოვრება მაქვს.
-როგორ შეარჩიე ანტვერპენის სამეფო აკადემია?
-დემნა: ეს იყო ჩემი მეგობარი, ჩემი ინგლისურის მასწავლებელი საქართველოში, რომელმაც მითხრა: ‘დემნა, შენ ის უნდა გააკეთო, რაც შენ გინდა.’ Central Saint Martins-ის ფული არ მქონდა, ამიტომ ფრანგული გაზეთი გამომიგზავნა, სადაც დაბეჭდილი იყო სტატია ევროპაში ხელოვნების საუკეთესო სკოლებზე. ანტვერპენის აკადემია 500 ევრო ღირდა, რადგან სახელმწიფო სკოლაა. ვიფიქრე, რომ უნდა მეცადა. არც ვიცოდი ანტვერპენი სად იყო. აკადემიაში მისაღები გამოცდის გასაუბრებაზე ჩემ წინ ვოლტერ ვან ბეირენდონქი იჯდა. ვოლტერმა მკითხა: ‘აბა გვითხარი რა იცი ანტვერპენის ექვსეულზე?’ მე მხოლოდ დრის ვან ნოტენზე ვიცოდი. არანაირი მარჯიელა, არაფერი. ცოდნა არ მქონდა. ვფიქრობ, ვოლტერს ესიამოვნა კიდეც, რომ მის შესახებ არ ვიცოდი. ეს ჩემი ბედი იყო, გასაუბრებაში ჩავიჭერი, მაგრამ მოგვიანებით მითხრეს, რომ ხატვის და მოდის ნაწილი ჩავაბარე.