კოალიცია ცვლილებისთვის ერთ-ერთ ლიდერს, ნიკა მელიას მოსამართლისთვის წყლის შესხმის გამო, წელიწადნახევრიანი პატიმრობა შეეფარდა. გადაწყვეტილება მოსამართლე ელენე გოგუაძემ გამოაცხადა
მელია სასჯელს წულუკიანის კომისიაზე გამოუცხადებლობის გამო, აღკვეთის ღონისძიების სახით შეფარდებული გირაოს გადაუხდელობისთვის იხდის, მას საპატიმრო დაწესებულება იანვარში უნდა დაეტოვებინა – დღევანდელი განაჩენის შემდეგ კი მას ციხეში ყოფნა 2026 წლის დეკემბრამდე მოუწევს.
საქმე ეხება 30 მაისს სასამართლო პროცესზე მომხდარ ინციდენტს, როცა ნიკა მელიამ მოსამართლე ირაკლი შვანგირაძეს პროტესტის ნიშნად წყალი შეასხა.
სასჯელის ვადის ათვლა 20 ივნისიდან დაიწყება.
მელიას ბრალდება სისხლის სამართლის კოდექსის 366-ე მუხლის მე-2 ნაწილით ( სასამართლოს უპატივცემულობა, რაც გამოიხატა მოსამართლის შეურაცხყოფით) ჰქონდა წარდგენილი, რაც სასჯელის სახედ და ზომად 2 წლამდე თავისუფლების აღკვეთას ითვალისწინებს.