აშშ-ის პრეზიდენტმა დონალდ ტრამპმა გადაწყვიტა, რომ მისი სპეციალური წარმომადგენლები — სტივ უიტკოფი და ჯარედ კუშნერი — პაკისტანში, ირანთან მოლაპარაკებებზე აღარ გაფრინდებიან, მიუხედავად იმისა, რომ ეს ვიზიტი ჯერ კიდევ გუშინ იყო დაგეგმილი. ამასობაში, ირანის საგარეო საქმეთა მინისტრი აბბას არაღჩი პაკისტანიდან ომანში გაფრინდა.
თავდაპირველად ტრამპმა უიტკოფისა და კუშნერის ვიზიტის გაუქმების შესახებ ტელეკომპანია Fox News-ს განუცხადა და თქვა, რომ „არ ღირს 18 საათის ფრენა იმისთვის, რომ იჯდე და არაფერზე ილაპარაკო“.
მოგვიანებით მან ეს გადაწყვეტილება საკუთარ საიტზეც დაადასტურა.
„ძალიან ბევრი დრო იხარჯება ფრენებზე, ძალიან ბევრი საქმეა! გარდა ამისა, მათ იქ, ‘ხელმძღვანელობაში’, საშინელი შიდა დაპირისპირება და არეულობა აქვთ. არავინ იცის, ვინ არის უფროსი — მათ შორის თავადაც“, — დაწერა ტრამპმა Truth Social-ზე.
„თანაც ჩვენ ყველა კოზირი ხელში გვაქვს, მათ კი არც ერთი! თუ საუბარი უნდათ, უბრალოდ უნდა დარეკონ!!!“ — განაგრძო აშშ-ის პრეზიდენტმა.
ამის შემდეგ ტრამპი ტელეფონით რამდენიმე ჟურნალისტს ესაუბრა და ერთ-ერთ მათგანს — გაზეთ New York Post-ის კორესპონდენტს, რომელიც ახლა ისლამაბადში იმყოფება და მოლაპარაკებებს ელოდება — SMS მისწერა: „სახლში დაბრუნდი!“
„ეს არც ისე კარგი ნიშანია მათთვის, ვისაც იმედი აქვს, რომ [უიტკოფისა და კუშნერის] ვიზიტი უახლოეს დღეებში მაინც შედგება“, — აღნიშნავს BBC-ს კორესპონდენტი.
ამრიგად, რა ბედი ელის სამშვიდობო მოლაპარაკებებს და ტრამპის მიერ გახანგრძლივებულ ზავს, კვლავ გაურკვეველია.
ირანთან ზავის განუსაზღვრელი ვადით გაგრძელების შესახებ, სწორედ მოლაპარაკებების მიზნით, ტრამპმა 21 აპრილს განაცხადა.
24 აპრილს თეთრმა სახლმა ჟურნალისტებს აცნობა, რომ უიტკოფი და კუშნერი — მაგრამ არა ვიცე-პრეზიდენტი ვენსი, რომელიც 11 აპრილს გამართულ პირველ შეხვედრაზე დელეგაციას ხელმძღვანელობდა — შაბათს ისლამაბადში გაფრინდებოდნენ.
„ამ დელეგაციას, რომელსაც ჯარედ კუშნერი და სტივ უიტკოფი ხელმძღვანელობდნენ, უკვე აღარ ჰქონდა ის წონა, რომელსაც მას ვიცე-პრეზიდენტი ჯეი დი ვენსი ანიჭებდა […] ის ფაქტი, რომ ახლა ამ შედარებით დაბალი დონის დელეგაციის ვიზიტიც კი გაუქმდა, აჩვენებს, რამდენად შორს დგანან მხარეების პოზიციები ერთმანეთისგან“, — მსჯელობს BBC-ის საერთაშორისო მიმომხილველი ჯო ინვუდი.
მოგვიანებით, ფლორიდიდან ვაშინგტონში გაფრენამდე ჟურნალისტებთან საუბრისას, ტრამპმა გაიმეორა თავისი თეზისი, რომ ირანის მმართველ წრეებში ძალაუფლებისთვის ბრძოლა მიმდინარეობს, და დაამატა, რომ მოლაპარაკებებისთვის მზად არის.
„მაგრამ მე საქმეს დავიჭერ ნებისმიერთან — ვისთანაც მოგვიწევს. თუმცა არ არის საჭირო ორი დღე ლოდინი, არ არის საჭირო, რომ ადამიანებმა 16–17 საათი იფრინონ. ჩვენ ასე არ მოვიქცევით […] როცა მოუნდებათ, დამირეკონ. ყველა კოზირი ჩვენ გვაქვს. ჩვენ ყველაფერი მოვიგეთ“, — თქვა ტრამპმა.
აშშ-ის პრეზიდენტმა განაცხადა, რომ მისი გადაწყვეტილებამდე — არ გაეგზავნა დელეგაცია — ირანმა შეერთებულ შტატებს წინადადებები გადასცა, რომლებიც საკმარისად კარგი არ იყო.
„და საინტერესო ის არის, რომ მას შემდეგ, რაც მე [მოლაპარაკებებზე ვიზიტი] გავაუქმე, 10 წუთში მივიღეთ ახალი დოკუმენტი, რომელიც ბევრად უკეთესია“, — განაცხადა ტრამპმა.
შაბათს ისლამაბადში ირანის საგარეო საქმეთა მინისტრი აბბას არაღჩი იმყოფებოდა, თუმცა ცოტას თუ სჯეროდა სერიოზულად, რომ ის, ისლამაბადი–მასკატი–მოსკოვის ტურნეში წასული, პაკისტანის დედაქალაქში ამერიკელ მომლაპარაკებლებს დაელოდებოდა.
იმავე შაბათს არაღჩი შემდგომი ვიზიტით ომანის დედაქალაქ მასკატში გაემგზავრა.
ისლამაბადში ვიზიტის შედეგებზე დაწერილ ტვიტში არაღჩიმ აღნიშნა, რომ ვიზიტი ძალიან ნაყოფიერი იყო; რომ მან პაკისტანის ხელმძღვანელობას გაუზიარა ირანის პოზიცია „ომის საბოლოოდ დასრულების სამუშაო ჩარჩოსთან დაკავშირებით“; და რომ ირანი ჯერ კიდევ არ არის დარწმუნებული, რამდენად სერიოზულად არის აშშ მოლაპარაკებებისთვის განწყობილი.
ამასთან, ამერიკული ტელეკომპანია CBS News-ის ცნობით, პაკისტანის ოფიციალური პირები ელიან, რომ არაღჩი შესაძლოა ისლამაბადში კვირას ან ორშაბათს დაბრუნდეს.